भांगरभूंय | प्रतिनिधी
रवी नायक हांच्या वावराचो फायदो जावपाचो विस्वास
विरोधकांचो भंय ना : रॉय नायक
तिनां परस चड उमेदवार रिंगणांत देंवपाची शक्यताय
भांगरभूंय । प्रतिनिधी
फोंडें : फोंडें पोटवेंचणुके खातीर भाजप वतीन रितेश रवी नायक आनी आप वतीन गितेश नायक हांच्या नांवाची घोशणा संवसार पाडव्याच्या म्हूर्तार केली. काँग्रेसी वतीन हाचे आदींच केतन भाटीकार हांच्या नांवाची घोशणा केल्ली. रितेश नायक हांकां उमेदवारी जाहीर केल्ल्यान नगरसेवक विश्वनाथ दळवी कसली भुमिका घेतले हाचे कडेन सगळ्यांचो नदरो लागिल्ल्या आसात.
भाजप वतीन रितेश नायक हांच्या नांवाची घोशणा बिरेस्तारा सकाळीं केली. ते उपरांत कांय वेळांतूच आपचे उमेदवार गितेश नायक हांच्या नांवाची घोशणा लेगीत केली. ताका लागून पोटवेंचणुकेंत तिना परस अदीक उमेदवार रिंगणांत देंवपाची शक्यताय उक्तायतात.
भाजपाची उमेदवारी जाहीर जाले उपरांत रितेश नायक हांणी फोंडेंच्या झरेश्वर देवळांत वचून आशिर्वाद घेतलो. त्या वेळार नगराध्यक्ष वीरेंद्र ढवळीकार, नगरसेवक रॉय नायक, आनंद नायक, रुपक देसाय, सरपंच नावेद तहसीलदार आनी हेर कार्यकर्ते व्हड संख्येन हाजीर आशिल्ले.
ह्या वेळार उलयतना रितेश नायक हांणी उमेदवारी जाहीर केल्ले खातीर मुख्यमंत्री डॉ. प्रमोद सावंत, प्रदेशाध्यक्ष दामू नायक आनी हेर भाजप फुडाऱ्यांनी दाखयल्ल्या विस्वासा खातीर उपकार मानले. मतदारसंघांत सर्गेस्त रवी नायक हांचो उणाव आसलो तरी लेगीत कार्यकर्ते व्हड नेटान काम करतले. मतदारसंघांत भाजपाचें जैत निश्चीत आसा. कुर्टी पंचायत आनी फोंडें पालिका वाठारांतल्या मतदारांक मेळपाचें काम चालूच आशिल्लें. ताचो निश्चीत फायदो जातलो, अशें तांणी सांगलें.
नगराध्यक्ष वीरेंद्र ढवळीकार हांणी सांगलें, रवी नायक हांणी केल्ल्या वावराची पुराय म्हायती मतदारसंघांतल्या लोकांक आसा. ताचो फायदो येता ते पोटवेंचणुकेंत रितेश नायक हांकां जातलो. भाजप कार्यकर्ते व्हड उमेदीन मतदारां कडेन संपर्क करतात. रितेश नायक हांचें जैत निश्चीत आसा.
उमेदवार रितेश नायक हांचें जैत निश्चीत मानतात. ताका लागून विरोधकांचो भंय ना, अशें नगरसेवक रॉय नायक हांणी सांगलें.
रितेश – केतन सोमारा दाखल करतले उमेदवारी
फोंडें पोटवेंचणुके खातीर भाजपाचे उमेदवार रितेश नायक आनी काँग्रेसीचे उमेदवार डॉ. केतन भाटीकार हे दोगूय सोमारा 23 मार्चाक उमेदवारी अर्ज दाखल करतले. पोटवेंचणुके खातीर 23 मार्च हो उमेदवारी अर्ज भरपाचो निमणो दीस आसा.
काँग्रेसीची उमेदवारी जाहीर जाले उपरांत हांवें प्रचाराक सुरवात केल्या. सोमारा 23 मार्चाक पक्षाचे फुडारी आनी समर्थकां सयत हांव उमेदवारी अर्ज दाखल करतलों, अशें डॉ. केतन भाटीकार हांणी सांगलें. इतले मजगतीं भाजप उमेदवार रितेश नायक हे सोमाराच अर्ज दाखल करतले, अशी म्हायती प्रदेश भाजप अध्यक्ष दामू नायक हांणी दिली. फोंडें पोटवेंचणूक जाहीर जाले उपरांत सोमार सावन उमेदवारी अर्ज घेवपाक सुरवात जाल्या. फोंडें सरकारी इमारत संकुलांत अर्ज घेवपा खातीर वेंचणूक अधिकाऱ्याची नेमणूक जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
