भांगरभूंय | प्रतिनिधी
खंडेपारा प्रकाश च्यारीन कागदा पसून तयार केल्यो गणपतीच्यो मुर्ती
फोंडें: चवथ दोन दिसांचेर येवन पावल्या. विवीध चित्रशाळेंत मुर्तींचेर निमाणो हात भोंवडावपाचें काम कलाकार करीत आसात. शुक्रारा सकाळ सावन मुर्ती व्हरपा खातीर लोक चित्रशाळेंत दाखल जातले. ताका लागून कलाकार काम पुराय करपा खातीर प्रयत्नशील आसात. मुर्डी खांडेपारा प्रकाश च्यारी आनी कुटुंबान तयार केल्ल्या कागदी गणेश मुर्ती लोकांचें आकर्शण थारता. कागदा पसून तयार केल्ल्या गणेश मुर्तीचें पुजन दर वर्सा उसगांव वाठारांत करतात.
मुर्डी खांडेपारा परंपरे प्रमाण फाटल्या खूबशा वर्सां सावन गणेश मुर्ती तयार करतात. ह्या वर्सा चिकण मातयेच्या मुर्ती बराबर च्यारी कुटुंबान दोन कागदपा पसून गणपतीच्यो मुर्ती तयार केल्यात. उसगांव वाठारांतले एक कुटूंब दरवर्सा कागदी गणपतीच्या मुर्तीचें पुजन करतात. तांच्या मागणी प्रमाण कागदी गणेश मुर्ती तयार केल्यात. ते खातीर अदमाशेक 10 कील कागद वापरला. दोनूय कागदी मुर्ती सयत च्यारी कुटूंब अदमाशेक 225 परस चड चिकण मातयेच्यो गणेश मुर्ती तयार करतात. ते खातीर लागपी चिकण माती दिवचल वाठारांतल्या विकती घेतात. ह्या वर्सा चिकण मातयेच्या मोलांत लेगीत सुमारा भायर वाड जाल्ली दिसून आयली.
प्रकाश च्यारी हांचो पूत प्रतीक च्यारी, धूव श्रेया च्यारी, घरकान्न आनी हेर कुटूंब दर वर्सा गणेश मुर्ती तयार करपा बरोबर रंगकाम लेगीत करीत आसतात. ताका लागून परंपरीक कला तिगोवन दवरपाक च्यारी कुटुंबान म्हत्वाचें योगदान दिलां. मुर्डी हांगासरल्या च्यारी कुटुंबा कडल्यान खूबशा वाठारांनी गणेश मुर्ती व्हरून पुजन करतात.
प्रकाश च्यारी हांणी म्हायती दितना दरवर्सा प्रमाण चिकण मातयेची गणेश मुर्ती तयार करतात. फाटल्या दोन वर्सांत उसगांव वाठारांत दोन कागदा पसून गणेश मुर्ती तयार करपाची ऑर्डर दिल्या. कागदा पसून मुर्ती तयार करपाक चड वेळ लागता. पूण गिरायकांचे मर्जी प्रमाण मुर्ती वेळार दिवपाचो यत्न करतात. कुटुंबाच्या सहकार्यान दर वर्सा वेळार गणेश मुर्ती गिरायकांक दीत आशिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
