भांगरभूंय | प्रतिनिधी
पालिकेंत जालें सादरीकरण; पयलो वापर आल्मेदा कडेन
भांगरभूंय । प्रतिनिधी
फोंडें: फोंडें पालिकेच्या सभाघरांत मंगळारा सकाळीं मुंबयच्या स्टुडियो पोड एजन्सी कडल्यान तयार केल्ल्या नव्या मास्टर प्लॅनाचें सादरीकरण जालें. ह्या वेळार शेतकी मंत्री रवी नायक, नगराध्यक्ष रितेश नायक, उपनगराध्यक्ष अर्चना डांगी आनी हेर नगरसेवक तशेंच फोंडें वाठारांतले मानेस्त हाजीर राविल्ले.
मास्टर प्लॅनाचें सादरीकरण जाले उपरांत पत्रकारां कडेन उलयतना नगराध्यक्ष रितेश नायक हांणी सांगलें, सगळ्यांत पयलीं मास्टर प्लॅनाचो वापर करून आल्मेदा हायस्कुला मुखार जावपी येरादारी कोयंडेचो प्रस्न तशेंच भुरग्यांचे सुरक्षेचो प्रस्न सोडयतले. मंगळारा सादरीकरण केल्ल्या मास्टार प्लॅनांत सुदरणा करपाची विनवणी खूबशा जाणकार लोकांनी केल्या. ताची दखल घेवन मास्टर प्लॅनांत बदल करतले, अशें तांणी सांगलें. मंत्री रवी नायक हांणी सांगलें, सादरीकरण केल्ल्या मास्टार प्लॅनांत कांय उणाव दिसल्यात. तातूंत निश्चीत बदल करतले. फोंडें शारांत सुवातेचो प्रस्न खुबूच गंभीर जाला. हे आदीं केरी, खांडेपार आनी कवळें पंचायतींचो कांय वाठार फोंडें पालिका वाठारांत आशिल्लो. ते वाठार परतून फोंडें पालिकेंत घेतले जाल्यार शाराची उदरगत नेटान जातली, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
