भांगरभूंय | प्रतिनिधी
फोंडें: आदले मुख्यमंत्री सर्गेस्त रवी नायक हांचो पुतळो आनी स्मारक उबारपाचो थाराव फोंडें नगरपालिकेचे बसकेंत संमत जालो. ज्येश्ठ नगरसेवक व्यंकटेश नायक हांणी हो थाराव दवरिल्लो. नगराध्यक्ष आनंद नायक हांणी नगरसेवकांची संमती घेवन तो मंजूर जाल्ल्याचें जाहीर केलें. वांगडाच प्रस्तावीत रिवर फ्रंट गार्डन प्रकल्पाक रवी नायक हांचें नांव दिवपाचें, तशेंच पालिकेचे नवे प्रशासकी इमारतींत रवी नायक हांचें तैलचीत्र लावपाचो थारावूय मंजूर केलो.
पालिका बसका जावचे पयलीं नगरपालिका मंडळ आनी कर्मचार्यांच्या वतीन रवी नायक हांकां आर्गां आोपलीं. ह्या वेळार नगराध्यक्ष आनंद नायक हांणी सांगलें, सेगीत कार्यरत कशें रावचें हें रवी नायक हांणी आपल्या कार्यांतल्यान आमकां दाखोवन दिलां. फोंडें म्हाल आनी आशिकुशीकच्या वाठारांत आयज जितले व्हड म्हत्वाचे प्रकल्प उबे आसात तांचें श्रेय रवी नायक हांकांच वता. ते खऱ्या अर्थान म्हान आशिल्ले. सौम्य उलोवन अधिकार्या कडल्यान आपलीं कामां कशीं करून घेवचीं हें तांचें कसब शिकपा सारकें आशिल्लें.
उपनगराध्यक्ष दीपा कोलवेकार हांणी सांगलें, नव्या लोकप्रतिनिधींक ते सदांच उपदेश करताले. तांचो उणाव सदांच जाणवत रावतलो.
ह्या वेळार नगरसेवक वीरेंद्र ढवळीकार, गीताली तळावलीकार, व्यंकटेश नायक हांणी विचार मांडून स. रवी नायक हांकां आर्गां ओपलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
