भांगरभूंय | प्रतिनिधी
भांगरभूंय । प्रतिनिधी
फोंडेंः फोंडें वाठारांतल्या रस्त्यांच्या चौपदरीकरण करपाच्या कामाक रोखडीच सुरवात जातली. ताचे पयलीं कंदब बसस्टॅण्डा वयल्यान बांदोड्या वचपा खातीर नवो अंडरपास तयार करतले. हें काम एप्रील म्हयन्याच्या निमण्या सप्तका मेरेन पुराय करून येरादारींत सुदारणा करतले. ते खातीर बांदकाम खात्या वतीन साडे पांच ते स कोटी रुपये खर्च करतले.
साफा मशीद सामकार अंडरपास नाशिल्ल्यान शापूर तशेंच चिरपुटें गांवांत वचपी वाहनांक मुखेल रस्त्यार यूटर्न घेवचो पडटा. तशेंच पोरण्या बसस्टॅण्डा वयल्यान कंदब बसस्टॅण्डार वचपी खाजगी बशी लेगीत यूटर्न घेवचो पडटा. ताका लागून बऱ्याच फावट अपघात जातात. फाटल्या आयताराक यूटर्न घेवपी खाजगी बशीचो धपको कारीक बसलो. शापूर आनी चिरपुटे गांवातले लोकांनी काय वर्सां पयलीं अंडरपासाक लागू आंदोलन लेगीत केल्लें.
बांदकाम खात्याच्या रस्तो विभागान सध्या कंदब बसस्टॅण्ड ते बांदोड्या वचपी रस्त्याचे 40 मीटर लांब अंडरपास बांदपाची प्रक्रिया पुराय केल्या. अंडरपास 22 मीटर रुंद आनी 9 मीटर उंच आसतलो. ते खातीर राष्ट्रीय म्हामार्ग प्राधिकरण सुमरा स कोटी रुपये खर्च करतलें. बांदकाम खात्यान आध्यात्मीक सर्व्हिस रोड तयार करपाच्या कामाक सुरवात केल्या. ते खातीर कदंब बसस्टॅण्डा लागीचे गाडे काडल्यात. अंडरपासाक लागून बांदोडें, शापूर आनी चिरपुटें वाठारांत वचपी तशेंच कदंब बसस्टॅण्डार येवपी वाहनांक बरे पडटले. बांदकाम खात्याच्या राष्ट्रीय म्हामार्ग विभागोच सहाय्यक अभियंतो आनंद वाघुर्मेकार हाणे अंडरपासाचें काम एप्रील म्हयन्या मेरेन पुराय जातले अशें सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
