भांगरभूंय | प्रतिनिधी
गोंयचें सांस्कृतीक दायज राखपी घुमट आरती परंपरेचो सांबाळ जावचे खातीर राजीव गांधी कला मंदीर, फोंडा हांणी आयोजीत केल्ले राज्य पांवड्यावेली घुमट आरती सर्त अंदूंय व्हडा उमेदीन जाली. घुमट हें परंपरीक वाद्य. मुखेलपणान हें वाद्य गणेशोत्सवाच्या काळांत घुमटांच्या तालार सादर जावपी आरती वेळार वापरतात. घुमट गोंयच्या सांस्कृतीक ठेवींतलें एक मोलादीक प्रतीक जावन आसा.
राजीव गांधी कला मंदिरान हे परंपरेक आधुनीक काळांतूय जिवी दवरपा खातीर राज्य पांवड्यावेले सर्तीच्या रुपांत एक म्हत्वाचें पावल उबारलां. हे सर्ती वरवीं घुमट आरतींक उर्बा दिवपाचो आनी तरणाटे पिळगे मेरेन आमचे दायज पावोवपाचो हेत कला मंदिराचो आशिल्ल्याचें तांणी सिद्ध करून दाखयलां.
परंपरा राखून दवरपा खातीर नवे नेम
हे सर्तींत परंपरा सांबाळपा खातीर कांय नवे नेम केल्यात. ह्या नेमांक लागून हे प्राचीन परंपरेची शुद्धताय राखून उरपाक मजत जातली. लोकांचो वाडिल्लो प्रतिसाद आनी विस्वास फाटल्या चार वर्सां सावन हे सर्तींत झळकता. सर्तीचो निकाल पुरायेन पारदर्शक आनी न्याय दिवपी आशिल्ल्यान लोकां मदीं हे सर्ती विशीं विस्वास आनीक वाडला. पुराय गोंयच्या विंगड विंगड गटांनी हे सर्तींत जैत मेळयलां. हाका लागून हे सर्तीक आनीक बरो प्रतिसाद मेळटा.
पंचायती/ नगरपालिकेक लागून वाडले सर्तक
पंचायत आनी नगरपालिका गटा खाला सर्त सुरू जाल्ल्याक विवीध गटां मदीं जैताची अपेक्षा वडल्या. ताका लागून हे सर्तींत ल्हव ल्हव करून वाडत वचपी सर्तक ह्या उपक्रमाचो म्हत्वाचो भाग जावन आसा.
हे सर्तींत राजकीय हस्तक्षेप नाशिल्ल्यान आनी निकालांत खरेंपण आशिल्ल्यान ही सर्त परत म्हत्वाची थारल्या. सुरवातेक जसो प्रतिसाद मेळटालो, तेच उमेदीचो आतां परत अणभव घेवपाक मेळटा.
समितीचें तोखणायेचें काम
सध्याचे समितीन घेतिल्ली मेहनत आनी केल्ले यत्न हे सर्तीचें म्हत्व परत घडोवपाक कारण थारले. तांणी आपले मूळ संस्कृतायेचो सांबाळ करीत सर्तीक आदलो मान-सन्मान मेळोवन दिलो.
राजीव गांधी कला मंदीर, फोंडें हांणी मुखेलपान कला आनी ह्या परंपरीक लोककलेक तिगोवन दवरपाची जापसालदारकी घेतल्या. घुमट आरतीच्या खर्या आत्म्याक लुकसाण जावचें न्हय म्हणून कला मंदिरान फाटल्या वर्सा नवे नेम केल्या. जायते गटांची तशी इत्सा आशिल्ली ती म्हळ्यार, अशे तरेचे नेम लागचे जे आरतीचो गौरव आनी परंपरीक मर्यादा तिगोवन दवरतले. खुबश्या गटांनी हे नवे नेम स्विकारले आनी कला मंदिराच्या ह्या निर्णयांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
