भांगरभूंय | प्रतिनिधी
पणजीः सेवा पखवाडा उपक्रमाचो एक भाग म्हूण आयज फोंडें उपजिल्होधिकारी आनी उपविभागीय दंडाधिकारी कार्यालयान भौशीक सेवा आनी कागाळ निवारण शिबिराचें आयोजन केल्लें.
ह्या शिबिरांत मामलेदार कार्यालय, भुंय सर्वेक्षण, अतिरिक्त जिल्होधिकारी, समाज कल्याण, पशुसंवर्धन, कामगार आनी रोजगार, शार आनी नगर नियोजन, विभागीय कृशी कार्यालय, बाल विकास प्रकल्प कार्यालय (सीडीपीओ), फोंडें नगरपालिका, उदकास्त्रोत विभाग (डब्ल्यूआरडी) आनी स्टेट बँक ऑफ इंडिया आनी हेर सरकारी विभागांचो वांटो आशिल्लो.
फोंडें नगरपालिकेच्या सहकार्यान लोकांक आधार कार्ड दुरूस्ती खातीर एक खास सुविधा उपलब्ध केल्ली. ह्या सेवेक लोकांचो भरपूर प्रतिसाद मेळ्ळो. निवास दाखलो, म्युटेशन, मुंडकार सनद, मतदार वळेरींतल्या तपशीलांची दुरुस्ती, नवीन मतदार अर्जां विशीं मार्गदर्शन आनी कागाळ निवारण अशां सेवांचो लोकांनी लाव घेतलो. लोकांक एकाच जाग्यार साबार सुविधां आनी सेवांचो लाव मेळिल्ले खातीर लोकांनी समाधान उक्तावन उपक्रमाची तोखणाय केली.
तशेंच म्हालांतल्या 20 कलमी कार्यावळीच्या लावधारकां मदीं विशेश जागृताय मोहीम राबयली. संबंदीत अधिकाऱ्यांनी 20 कलमी कार्यावळीच्या वाठारांत भेट दिवन सरकारान जाहीर केल्ल्या येवजणेचो लाव घेवपा खातीर अर्ज वाटले आनी प्रक्रिये संबंदी मार्गदर्शन केले.
बांदोड्यां पंचायतीत फोंडेचें मामलेदार मेघना पी. नायक, तलाठी ब्रिजेश नायक हांणी नागरिकां कडेन संवाद साधून येवजणेची सविस्तर म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
