भांगरभूंय | प्रतिनिधी
मडगांव: फोंडें विधानसभा मतदारसंघाच्या पोटवेंचणुक खातीर दक्षीण गोंयच्या जिल्लोधिकारी एग्ना क्लिटस (आयएएस) हांणी विवीध निर्बंधां विशीं आदेश जारी केला. ९ एप्रिलाक जावपी मतदानाचे फाटभूंयेर ७ एप्रिलाक सांजेवेळार ६ वरां पसून मतदारसंघांत फुडलीं ४८ वरां रॅली, सभा घेवपा वांगडा सोरो विकपाचेर बंदी आसतली.
वेंचणूक प्रक्रिया निश्पक्ष आनी शांतिकायेन जावपा खातीर जिल्लो प्रशासन तयार आसा. कायदो आनी सुवेवस्था राखपा खातीर ७ एप्रिलाक सांजेवेळार ६ वरां मेरेन ही मतदान प्रक्रिया सोंप मेरेन कसलेय तरेच्यो जाहीर सभा, मिरवणुको, कोणसो सभा वा रॅली काडपाक खर बंदी घाल्या. ह्या ४८ वरांच्या काळांत वेंचणूक प्रचारा खातीर लावडस्पीकराचो वापर करपाक पुरायेन बंदी घाल्या.
तशेंच, ७ एप्रिलाक सांजेवेळार ६ वरांच्यान ते ९ एप्रिलाक मतदान सोंपसर सगली सोरो विकपाचीं दुकानां, बार आनी रेस्टॉरंटां बंद आसतलीं. मतमेजणी दिसा म्हळ्यार ४ मेकूय ’ड्राय डे’ पाळटले. मतदान केंद्रांच्या १०० मीटर वाठारांत पांच वा ताचे परस चड जाणांनी एकठांय येवपाक बंदी आसतली. फकत मतदाना खातीर रांकेंत उबें रावपी मतदारांकूच ह्या वाठारांत परवानगी दितले. रोख रक्कम, भेटवस्त वा सोरो वाटप आडावपा खातीर पुलीस दळा वतीन वाहनांची खर तपासणी करतले.
दक्षीण गोंय पुलीस अधीक्षक आनी फोंडें उपविभागीय पुलीस अधिकार्यांक ह्या आदेशाची खर अंमलबजावणी करपाचे निर्देश दिल्यात. नेम मोडप्यांचेर खर कायदेशीर कारवाय करतले. मतदान प्रक्रिया शांतीकायेन जावचे खातीर सगले उमेदवार, राजकीय पक्ष आनी नागरिकांनी वेंचणूक आयोगाचे नेम पाळचे, असो उजो जिल्लोधिकार्यांनी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
