भांगरभूंय | प्रतिनिधी
उसगांव ग्रामसभा: विवीध म्हत्वाचे थाराव घेतले
फोंडें: फोंडें पंचायत वाठारांतले बदलिल्ल्या घर नंबरांची दुरुस्ती करून परत पोरणे नंबर दिवचे, वाड केल्ले घर पट्टेंत कपात करप आनी उसगांवां रावपी लोकां खातीर ५ लाख चौखण मिटर सुवात कोमुनिदाद कडल्यान पंचायतीन घेवची. तशेंच हेर म्हत्वाचे थाराव आयतारा उसगांवां पंचायतीचे ग्रामसभेंत घेतले.
सरपंच प्रकाश उर्फ संजय गावडे हांच्या अध्यक्षते खाला आयतारा पंचायतीची ग्रामसभा जाली. उजगांव पंचायत वाठारांतल्या लोकांच्या जायत्या पोरण्या घरां खुबश्या लोकांचो पोरणो घर नंबर बदलून नवो घर नंबर दिला. हाका लागून लोकांचें आधार कार्ड, रेशन कार्ड आनी हेर कागदपत्रांचेर वेगवेगळे घर नंबर नोंद जाल्ल्यान आडखळ निर्माण जाल्या. हेर कागदपत्रांचेर घर नंबर बदलपाच्या जाग्यार पंचायत मंडळांनी फुडाकार घेवन घर धनयांक पोरणे नंबर दिवपाचो म्हत्वाचो थाराव आयतारा जाल्ले ग्रामसभेंत घेतलो.
पंचायत मंडळांनी घरपट्टींत बरीच वाड केल्ल्यान लोकांक व्हड फटको बसला. अंदाजान २०० ते ३०० रुपया घरपट्टी भरपी लोकांक ३ हजार परस चड घरपट्टी पंचायत कार्यालयांत भरपाची वेळ आयली. लोकांच्या हिता खातीर पंचायत मंडळांनी घरपट्टींत कपात करपाचो थाराव आयतारा घेतलो. तशेंच कोमुनिदाद समितीन ह्यान पयलीं कितल्याशाच जाणाक जमनींत विक्री केल्ल्यान थळाव्यांचे भावी पिढी खातीर पंचायतीन ५ लाख चौरस मिटर सुवातो घेवपाचो ग्रामस्थांनी घेतला. तशेंच मैदाना खातीर सुवातूय कोमुनिदाद समिती कडल्यान घेवपाचो थाराव घेतला.
सरपंच प्रकाश उर्फ संजय गावडे हांणी वाड केल्ले घरपट्टींत कपात करपाचो थाराव ग्रामस्थांनी घेतिल्ल्यान ते संबंदी तांच्या अधिकार्यां कडेन फाटपुरवण करतले. तशेंच लोकांच्या बदलपी घर नंबर संबंदी तपासणी करून निर्णय घेतले. पंचायत वाठारांतले भावी पिळगे खातीर कोमुनिदाद समिती कडल्यान जागा पंचायत घेवपा खातीर गरजेचो सोपस्कार करपाचें सांगलें.
मजगतीं, उसगांवां गरीब, विधवा तशेंच आधार नाशिल्ल्या जाण्ट्यां बायलां कडल्यान पोरणींच घरपट्टी आकारपाचो निर्णय पंचायत मंडळान घेतला. ताचो लाव निश्चीतूच गरीब लोकांक जातलो अशें सरपंच प्रकाश उर्फ संजय गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
