भांगरभूंय | प्रतिनिधी
13 म्हयन्यांचे चलयेचें अपहरण करून केल्ले लैंगीक अत्याचार
भांगरभूंय । प्रतिनिधी
पणजीः फोंडें वाठारांत 2015 त 13 म्हयन्यांचे चलयेचें अपहरण करून तिचेर लैंगीक अत्याचार केल्लो. ह्या प्रकरणांत बाल न्यायालयान 28 वर्सां पिरायेच्या तरणाट्याक 20 वर्सांची खर बंदखण आनी 9.50 लाख रुपयांच्या दंडाची ख्यास्त फर्मायल्या. हे विशींचो आदेश बाल न्यायालयाची अध्यक्ष सई प्रभुदेसाय हांणी दिला.
ह्या प्रकरणांत फोंडें पुलिसांनी 31 मे 2015 ह्या दिसा गुन्यांव दाखल केल्लो. ते प्रमाण, ह्या प्रकरणांत पिडीत चलयेच्या बापायन कागाळ दाखल केल्या. 30 मे 2015 ह्या दिसा दनपारां 1.30 ते 2.30 वरां मजगतीं शेजाराक रावपी दुबावितान ताचे 13 म्हयन्यांचे चलयेचें अपहरण केलें. ते उपरांत दुबावितान ताच्या बापायचे गाडयेंत व्हरून तिचेर लैंगीक अत्याचार केल्ल्याचें म्हणलां.
ह्या प्रकरणांत फोंडें पुलीस स्टेसनाचे तेन्नाचे पुलीस निरिक्षक सुदेश नायक हांणी दुबावीत तरणाट्या आड भारतीय दंड संहितेच्या विवीध कलम, गोंय बाल हक्क कायदो आनी बाल लैंगीक शोशण विरोध कायद्या खाला गुन्यांव दाखल करून अटक केली. ते उपरांत पुलिसांनी तपास पुराय करून 25 जानेवारी 2016 ह्या दिसा बाल न्यायालयांत दुबाविता आड आरोपपत्र दाखल केलें.
ह्या प्रकरणांत न्यायालयांत सरकारी वकील अॅना मेडोंका आनी थेमा नार्वेंकार हांणी युक्तीवाद मांडून दुबाविता आडचे पुरावे सिद्ध केले. तशेंच हे संबंदांत वैजकी अहवाल सकारात्मक आयिल्ल्याचो दावो करून दुबाविताक खर ख्तास्त दिवपाची मागणी केली.
ह्या प्रकरणांत बाल न्यायालयान 28 वर्सां पिरायेच्या तरणाट्याक 13 म्हयन्यांचे चलयेचें अपहरण केल्ल्या प्रकरणांत पांच वर्सांची बंदखण आनी 50 हजार रुपयांच्या दंडाची ख्यास्त फर्मायल्या. दंड भरलो ना जाल्यार एका वर्साची सादी बंदखण, लैंगीक अत्याचार केल्ल्या प्रकरणांत भादंसंच्या कलम 376 (2) (1) खाला 20 वर्सांची खर कश्टाची बंदखण आनी 5 लाख रुपयांचो दंड. दंड भरलो ना जाल्यार पांच वर्सांची सादी बंदखण. गोंय बाल कायद्याचें कलम 8 (2) खाला 20 वर्सांची खर कश्टाची बंदखण आनी 2 लाख रुपया दंड. दंड भरलो ना जाल्यार दोन वर्सांची सादी बंदखण. बाल लैंगीक शोशण विरोधी कायद्याचें कलम 6 खाला 20 वर्सांची खर कश्टांची बंदखण आनी 2 लाख रुपया दंड. दंड भरलो ना जाल्यार दोन वर्सांची सादी बंदखण फर्मायल्या. जाल्यार वयल्यो ख्यास्ती एकठांय भोगपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
