भांगरभूंय | प्रतिनिधी
पणजी: आदले मुख्यमंत्री रवी नायक हांच्या मरणाक लागून खाली जाल्ल्या फोंडें मतदारसंघा खातीर 9 एप्रीलाक मतदान जातलें. केंद्रीय वेंचणूक आयोगान पोटवेंचणुकेची पुराय कार्यावळ काल (आयतारा) जाहीर केली. एसआयआर मतदार वळेरीचेर जावपी ही पयली वेंचणूक आसतली. फाटले वेंचणुके परस आतां 4230 मतदार उणें जाल्ल्यान समीकरणां बदलतलीं. उणें जाल्ले मतदार कोणाक लावकारी थारतले ताचेर वेंचणुकेचे यश निश्चीत आसा. मतमेजणी सोमारा 4 मे दिसा जातली.
डॉ. प्रमोद सावंत हांच्या फुडारपणा खालच्या सरकारांत रवी नायक हे शेतकी मंत्री आशिल्ले. 15 ऑक्टोबर 2025 ह्या दिसा तांकां मरण आयलें. नेमा प्रमाण सुवात खाली जातकच 6 म्हयन्या भितर वेंचणूक घेवप आवश्यक आसता. हाका लागून 15 एप्रील मेरेन फोंडें पोटवेंचणूक जावप गरजेचें आसलें. केंद्रीय वेंचणूक आयोगान हेर पांच राज्यांच्या वेंचणुके सयत फोंडें पोटवेंचणुकेची तारीख जाहीर केली. हाका लागून फोंडें मतदारसंघात आतां राजकी घडणुकां सयत प्रचाराचो नेट वाडटलो.
वेंचणुकेची अधिसुचोवणी आयज जाहीर जातली. हाका लागून फोंडें मतदारसंघा खातीर आयज सावन आचारसंहिता लागू जातली. 23 मार्च 2026 मेरेन उमेदवारी अर्ज सादर करपाची मुजत आसा. फाटले वेंचणुके प्रमाण भाजप आनी काँग्रेस ह्या दोन पक्षां मदीं लडत जातली.
भारतीय जनता पक्षान रवी नायक हांचे पूत रितेश नायक आनी विश्वनाथ दळवी हीं दोन नांवां उमेदवारी खातीर केंद्रीय समितीक धाडल्यात. रितेश नायक हांका उमेदवारी दिवपाची मागणी आशिल्ल्यान भाजप उमेदवारी खातीर तांचेंच नांव मुखार आसा. केंद्रीय संसदीय मंडळ चर्चा करून उमेदवाराचें नांव निश्चीत करतलें, अशी म्हायती प्रदेश भाजप अध्यक्ष दामू नायक हांणी दिली.
काँग्रेसीचो विचार करीत जाल्यार आयज सांजे काँग्रेसीच्या वेंचणूक समितीची बसका जातली. काँग्रेस उमेदवाराची घोशणा लेगीत केंद्रीय नेतृत्व करतलें. आम आदमी पक्षा कडल्यान प्रचार सुरू आशिल्ल्यान आप लेगीत फोंडें पोटवेंचणुकेंत उमेदवार जाहीर करतलो अशें चित्र आसा.
फोंडें मतदारसंघांत सर्गेस्त रवी नायक हांचेंच वर्चस्व उरलां. 1999 सावन 2012ची वेंचणूक सोडली जाल्यार सेगीत फोंडें मतदारसंघातल्यान ते जैतिवंत जाल्यात.
4230 मतदार जाले उणें
2022च्या वेंचणुके परस फोंडें मतदारसंघांत आतां 4230 मतदार उणें जाल्यात. फाटले वेंचणुकेंत फोंडें मतदारसंघात वट्ट 32157 मतदार आशिल्ले. एसआयआर मोहिमे उपरांत फोंडें मतदारसंघांत 27927 मतदार जाल्यात. आतां दादले मतदारांचो आंकडो 13974 जाल्यार बायलां मतदारांचो आंकडो 13953 आसा.
फाटले वेंचणुकेंत रवी नायक हे कांठा वेल्या मताधिक्क्यान वेंचून आयिल्ले. मगोचे डॉ. केतन भाटीकार हांणी तांकां खर झुज दिल्ली. आतां मतदारांचो आंकडो उणो जाल्ल्यान लडत अटीतटीची जातली, हे निश्चीत आसा.
फोंडा मतदारसंघाची वेंचणूक जाहीर करपाच्या निर्णयाक हांव येवकार दितां. फोंडें मतदारसंघात भाजपाचे जैत निश्चीत आसा. सर्गेस्त रवी नायक हांचो वावर फुडें व्हरपा खातीर फोंडेंकार भाजपाक परतून संद दितले. केंद्रांतल्यान बेगिनूच भाजप उमेदवाराची घोशणा जातली, अशें मुख्यमंत्री डॉ. प्रमोद सावंत हांणी सांगलें.
फोंडें पोटवेंचणुकेचें सविस्तर वेळापत्रक :
पोटपोटवेंचणुकेची अधिसुचोवणी : 16 मार्च 2026 (सोमार)
उमेदवारी अर्ज भरपाची निमाणी : 23 मार्च 2026 (सोमार)
उमेदवारी अर्जांची छाननी : 24 मार्च 2026 (मंगळार)
उमेदवारी अर्ज फाटीं घेवपाची तारीख : 26 मार्च 2026 (बिरेस्तार)
मतदानाची तारीख : 9 एप्रील 2026 (बिरेस्तार)
मतमेजणी तारीख : 4 मे 2026 (सोमार)
दोन उेमवदारांचीं नांवां पक्षश्रेश्ठीं कडेन
मडगांव: फोंडें पोटवेंचणुकेची तारीखा काल (आयतारा) सांजवेळा जाहीर जाली. उपरांत भाजप पक्षाच्या राज्य वेंचणूक समितीचे बसकेंत दोन नांवां उमेदवारी खातीर निश्चीत जाल्यांत. तशेंच दिल्लीतले बसके उपरांत उेमवदारांचें नांव जाहीर जातलें. भाजप उमेदवारी थारायतना लोकशाय पद्दत आपणायता. ते प्रमाण भाजपाची राज्य वेंचणूक समितीची बसका जाली. ते बसकेंत फोडें पोटवेंचणुके संबंदी विवीध प्रकारची चर्चा जाली. ते बसके उपरांत दोन नांवां निश्चीत केल्यांत. तीं दोन नांवां दिल्लींतल्या पक्षश्रेश्ठीं कडेन धाडून दिल्यांत अशें भाजपाचे प्रदेशाध्यक्ष दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
