भांगरभूंय | प्रतिनिधी
पणजी : फोंडें विधानसभा पोटवेंचणुके खातीर उमेदवारी अर्ज भरपाच्या निमाण्या दिसा राजकी घडामोडींक वेग आयला. भाजपाचे उमेदवार रितेश नायक, काँग्रेसीचे डॉ. केतन भाटीकार आनी आम आदमी पार्टीचे गीतेश नायक हांणी आपापल्या समर्थकां सयत आनी वरिश्ठ फुडाऱ्यांचे हाजिरेंत उमेदवारी अर्ज दाखल केले. हाका लागून फोंडें पोटवेंचणूक आतां तिरंगी आनी चुरशीची जातली हें स्पश्ट जालां.
एके वटेन भाजपान नाराज फुडाऱ्यांची समजूत काडून एकीचे बळ दाखयलें, जाल्यार दुसरे वटेन काँग्रेसीन ‘आरजी’च्या तेंक्याचेर जैताचो विस्वास उक्तावन सरकाराचे खर टिका केल्या.
आदले मुख्यमंत्री रवी नायक हांचो पूत रितेश नायक हांणी मुख्यमंत्री डॉ, प्रमोद सावंत हांचे उपस्थितींत अर्ज भरलो. उमेदवारी मेळूंक नाशिल्ल्यान नाराज आशिल्ले भाजपाचे मूळ फुडारी विश्वनाथ (अपूर्व) दळवी हांची मुख्यमंत्र्यान तांच्या घरा वचून भेट घेतली. चर्चे परांत दळवी हांणी रितेश नायक हांकां आपलो तेंको जाहीर केल्ल्यान भाजपाचो मार्ग सोंपो जालो. दळवी हे पक्षाचे निश्ठावान कार्यकर्ते, तांणी रितेशाक आपलो तेंको दिला, अशें मुख्यमंत्र्यान ह्या वेळार स्पश्ट केलें.
काँग्रेसीचे उमेदवार डॉ. केतन भाटीकार हांणी गोंय प्रभारी माणिकराव ठाकरे आनी विरोधी पक्ष फुडारी युरी आलेमांव हांचे उपस्थितींत अर्ज दाखल केलो.
ह्या वेळार युरी आलेमांव हांणी भाजपाचेर लोकशायेची हत्या केल्ल्याचो आरोप केलो. गोंयाक वाटावपा खातीर आपल्याक वीख पिवचें पडलें तरीय आपूण तयार आसा, अशें तांणी सांगलें. तशेंच रिव्होल्युशनरी गोवन्स पार्टीन (रजी) दिल्ल्या तेंक्याक लागून भाजपाक हारोवप सोंपें जातलें, असोय विस्वास तांणी उक्तायलो. रवी नायक हांच्या मूळ काँग्रेस विचारधारेचें दायज आपुणूच फुडें व्हरतलों, असोय तांणी दावो केलो.
आम आदमी पार्टी वतीन गीतेश नायक हांणी कार्यकर्त्यांचे व्हड हाजिरेंत आपलो उमेदवारी अर्ज सादर केलो. मजगतीं, प्रशासकीय यंत्रणेचो गैरवार जाता असो आरोप करून विरोधकांनी भाजपाक कातरेंत धरलो, पूण प्रत्यक्ष मतदानांत फोंडेंकार कोणाच्या दाल्यांत आपलें वजन घालतात, हें पळोवप म्हत्वाचें थारतलें. फोंडें पोटवेंचणुके खातीर आतां तिनूय मुखेल पक्षांचे उमेदवार निश्चीत जाल्ल्यान फुडल्या कांय दिसांनी प्रचार सामकोच तेंगशेर पावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
