भांगरभूंय | प्रतिनिधी
मतदान कर्मचाऱ्यांची तिसरे खेपे तपासणी पुराय
मडगांव: फोंडें विधानसभा पोटवेंचणुके खातीर दक्षीण गोंयच्यो जिल्होधिकारी आनी जिल्हो वेंचणूक अधिकारी एग्ना क्लिटस हांच्या मार्गदर्शना खाला मतदान कर्मचाऱ्यांची तिसरे खेपे तपासणी जाली.
फोंडें विधानसभा पोटवेंचणुकेचे फाटभुंयेर, वेंचणूक प्रक्रियेंत पुराय पारदर्शकताय राखपा खातीर सामान्य निरिक्षक सुश्री पुजा पार्थ हांचे हाजिरेंत ही प्रक्रिया जाली. फोंडें मतदारसंघांत वट्ट 45 मतदान केंद्रां उबारल्यांत. वेंचणुके खातीर 54 मतदान पंगड तयार केल्यात.
रँडमायझेशन सॉफ्टवेरा वरवीं मतदान कर्मचाऱ्यांची संबंदीत केंद्रांचेर नेमणूक करून निमाणी वळेरी तयार केल्या आनी ती सीलबंद केल्या.
बुधवारा वट्ट 270 मतदान कर्मचारी वेंचणूक निर्णय अधिकाऱ्यां कडेन हजर जातले. उपरांत गरजेची खबरदारी आनी खर सुरक्षा वेवस्थेंत ईव्हीएम मशिनां सयत हे कर्मचारी नेमून दिल्ल्या मतदान केंद्रां कडेन वतले.
पारदर्शकताय आनी निश्पक्ष वेंचणूक जावची हे खातीर सगले तरेची गरजेची प्रशासकी तयारी पुराय जाल्ल्याचें जिल्हो वेंचणूक प्रशासनान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
