भांगरभूंय | प्रतिनिधी
पणजी: फोंडें पोटवेंचणुकेचे फांटभुंयेर फोंडें आनी दक्षीण गोंयांत आचारसंहिता लागू जाल्या. देखून विधानभेंत अर्थीक घोशणा करपाक निर्बंध येतात असो युक्तिवाद विजय सरदेसाय हांणी करुन स्पश्टीकरणाची मागणी केली. हे विशीं चर्चा करून दनपार मेरेन निर्णय कळोवपाचें मुख्यमंत्री डॉ. प्रमोद सावंत हांणी सांगलें.
अधिवेशनाचे सुरवेकच फातोड्डेंचे आमदार विजय सरदेसाय हांणी सभाघराच्या लक्षांत हाडून दिलें, फोंडें पोटवेंचणूक जाहीर जाले उपरांत दक्षिण गोंयांत आचार संहीता पाळपाचे निर्देश मुखेल वेंचणूक आयोगान सगळ्या राज्यांतल्या मुखेल सचिवांक दिल्यात.
ह्या निर्देशा प्रमाण सभाघरांत फकत दक्षीण गोंयां खातीर वर्स २०२६- २०२७ अर्थ संकल्पीय तरतूदी, मागण्यो आनी अनुदान, प्रश्न काळांत अर्थीक आस्वासनां दिवपाक मुख्यमंत्री आनी मंत्र्याचेर निर्बंध येतात.देखून सरकार फकत दक्षीण गोंय कुशीक दवरून अधिवेशन फुडें व्हरतले कांय हे विशीं कितें तोडगो काडटले, असो प्रस्न सरदेसाय हांणी केलो.
आचार संहीतेच्या काळांत आमी विधेयकां आनी अर्थसंकल्पीय आस्वासनां मंजूर करपाक शकनात. आचारसंहिता ही दक्षिण गोंयांत लागू जाल्ल्यान दक्षीण गोंयां खातीर आमी कसलेंच आस्वासन दिवपाक शकनात. नेमांच्या वेळाच्या आदाराचेर चर्चा करुन हे विशींचो निर्णय दनपार मेरेन कळीत करता, अशी जाप डॉ. सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
