फोंडें पोटवेंचणुकेंत भाजप मुखार

भांगरभूंय | प्रतिनिधी

रितेशाक विधानसभा वेंचणूक, वेंचणुकेंतल्या राजकारणाची म्हायती आसा. नगरसेवक, नगराध्यक्ष म्हणून ताणें आपलें अस्तित्व दाखोवन दिलां.

दिवाळे आदल्या दिसा गोंयचे आदले मुख्यमंत्री रवी नायक हांकां सरकारान आर्गां ओंपलीं. रवीबाब हांचे पूत रितेश आनी राॅय कला अकादमीत त्यावेळार हाजीर आशिल्ले. सभाघरांत मुख्यमंत्री डाॅ.प्रमोद सावंत हांच्या लागींच्या कदेलार रितेश बशिल्लो. तेन्नाच ताची विधानसभेर वचपाची वाट मेकळी जाता हें कळळें. 2022 चे विधानसभा वेंचणुकेंत फोंडें मतदारसंघांत महाराष्ट्रवादी गोमंतक पक्ष (मगो) भाजपाच्या उमेदवाराचो मुखेल विरोधक आशिल्लो. सर्त, झूज पात्रांव रवीबाब जिखले. ते विरोधकांक पात्रांव म्हणटाले. पत्रकारांक रवीबाबांचें चाय पिओ, समोसा खाओ चड दिसलें.
रितेशाक मगोचो वीज मंत्री सुदिनबाब ढवळीकार हांचो पोटवेंचणुके पासत मेळिल्लो तेंको म्हत्वाचो. प्रियोळ मतदारसंघाचे आमदार गोविंदबाब गावडे, आदले आमदार दिपकबाब ढवळीकार तांचे बराबरीन आसात. तांच्याय तेंक्याक म्हत्व आसा. लागसारच्या शिरोडें मतदारसंघाचे आमदार, मंत्री सुभाष शिरोडकार रितेशा वांगडाच रावतले.
सुदिनबाब आपल्या पुताक फुडल्या पांच वर्सांत विधानसभेर पावोवपाची तयारी करतात हें सत लिपून उरुंक ना. सुदिनबाबांचे पूत चड शिकिल्ले, तंत्रज्ञानान फुडें वचपी. 2027त भाजपाची मोख 27 आमदारांची आसा. 2022 चे विधानसभा वेंचणुकेंत मगो, भाजपा युती नासतना भाजपाचे 20 आमदार जिखिल्ले. केंद्रांत आनी राज्यांत भाजपा इश्ट पक्षांचें युती सरकार आशिल्ल्याचो लाव गोंयांत भाजपाक मेळ्ळो. 2027चे विधानसभा वेंचणुकेंत मगो, भाजपाची युती जातली हें अप्रत्यक्षपणान हालीं वीज मंत्री सुदिनबाब सांगपाक लागल्यात. सुदिनबाबांचे आदर्श गोंयचे चड तेंपाचे आदले मुख्यमंत्री प्रतापसिंह राणे.
राज्यांतले विरोधी पक्षाचे वांगडी, लोकप्रतिनिधी नरकासूर सर्तींत एके माचयेर येवन आमी एकठांय येवपाचो विचार करतात अशें सांगताले तेन्ना भाजपाचो उमेदवार पोट वेंचणुके खातीर निश्चीत जाल्लो. महाराष्ट्राचे मुख्यमंत्री देवेंद्र फडणवीस 2022त विधानसभा वेंचणुकेंत गोंयांत भाजपाचे वेंचणूक वेवस्थापन मुखेली आशिल्ले. ते रवीबाबांक आर्गां ओंपपाक येवप हो व्हड योगायोग. महाराष्ट्राच्या मुखेलमंत्र्यांनी 2022 आदींय गोंय विधानसभेच्या कांय मतदारसंघांनी वेंचणूक मुखेलीपण केल्लें. महाराष्ट्राच्या मुख्यमंत्र्यांक गोंय, गोंयचे लोकप्रतिनिधी, मतदारसंघ तशे वळखीचे. महाराष्ट्र आनी गोंय हीं दोन शेजारीं राज्यां भाजपा कडेन आशिल्ल्यान लाव भाजपाक जाता.
गोंयचे विरोधी पक्ष मुखेली युरी आलेमांव, गोवा फाॅरवर्डाचे आमदार आनी पक्षाचे अध्यक्ष विजय सरदेसाय, रिव्होल्युशनरी गोवन्साचे मनोज परब 2024 वर्सां कित्याक एकठांय आयले ना? 2025च्या फाटल्या आठ महिन्यांनी एकवटाचो उलो मारपाक तांकां म्हूर्त कित्याक मेळ्ळो ना? आतांय काँग्रेस आनी दोन प्रदेशीक पक्ष एकठांय येवपाचें चिंततात तें सांगपाक म्हूर्त खंयचो तर फातोड्डें मतदारसंघांतल्या नरकासूर सर्तीचे कार्यावळीचो. तीन पक्ष एकठांय येतना 2022चे विधानसभा वेंचणुकेंत काँग्रेस, गोवा फाॅरवर्डा बरोबर आशिल्ल्या आम आदमी पार्टीचे लोकप्रतिनिधी फातोड्ड्यां माचयेर कित्याक नाशिल्ले? जापो सोदपाचे येत्न केल्यार विरोधक एकठांय आयल्यार लाव भाजपाक जातलो ही जाणविकाय गोंयकारांक जाल्या.
गोवा फाॅरवर्डाक फाटल्या 10 वर्सांनी 10 मतदारसंघां मेरेन पक्षाची बांदावळ करप शक्य जालें ना. 2026 डिसेंबर मेरेन 5 मतदासंघांनी पक्ष बळिश्ट करपाचो वावर गोवा फाॅरवर्ड करपाची शक्यताय ना. पत्रकार परिशदो घेवप, भौशीक कार्यावळींनी घोशणा करप, सरकारा आड आवाज उठोवपा परस पक्षाची बांदावळ गोवा फाॅरवर्डान केल्ली जाल्यार विजय सरदेसाय 2022 वर्सा विरोधी पक्ष मुखेली जावपाचे. 2022चे विधानसभा वेंचणुकेंत विजयबाब आपल्या घरा काँग्रेसीत परतल्ले जाल्यार तांकां विरोधी पक्ष मुखेली जावपाची संद मेळपाची. 2027चे वेंचणुकेंत तांकां फुडारांतले मुखेलमंत्री म्हणून काँग्रेस, आरजीपी मुखार हाडत व्हय? तांचे परस आरजी, आम आदमी पक्षा कडेन उंचेले शिक्षण घेतिल्ले फुडारी आसात. गोवा फाॅरवर्डांत आशिल्ल्या फुडाऱ्यांक आरजी, आम आदमी पार्टी आपल्या वांगडा व्हरपाची शक्यताय आसा. विरोधी पक्ष मुखेल्यांचो फाटलो इतिहास पळयत जाल्यार युरीबाब दोन आमदारां सयत भाजपांत गेल्यार अजाप दिसचें ना. निमाण्या वेळार भाजपा, आम आदमी पार्टीची उमेदवारी मेळ्ळी ना जाल्यार काँग्रेस, गोवा फाॅरवर्डाची उमेदवारी घेवपाक 10 – 20 फुडारी तयार आसतले. जिखतले दोन ते तीन. मतदार थिराय पळयता, हेवटेन तेवटेन वचपी उमेदवार न्हय. 2027 वेंचणुकेंत उमेदवाराची पिराय, उंचेलें शिक्षण, लोकां मदीं वचून वावुरपाची, जिखपाची तांक, भुजांबळ आनी पयसो म्हत्वाचो आसतलो.
जिल्हो, नगरपालिका वेंचणुकेंतल्यान विधानसभे मेरेन पावपी लोकप्रतिनिधी राजकी पक्षांक मेळटले. नरकासूराचे सर्तीचे माचयेचो उपेग विरोधी फुडाऱ्यांनी तेखातीर केला आसतलो. जिल्हो, नगरपालिका वेंचणुकेंतल्यान थिराय दिवपाचें उतर लोकांक मेळपाक जाय.
जिल्हो पंचायत, पंचायत वांगडी, सरपंच, उपसरपंच, फोंडेंचे नगराध्यक्ष फोंडें विधानसभा पोटवेंचणुकेंत रितेशा बराबर आसतले हातूंत दुबाव ना. भाजपाच्या हेर वांगड्यांकय फोंडें पोटवेंचणुकेंत देंवपाची इत्सा आसतली पूण ह्या खिणाक वारें रितेशा वाटेन व्हांवता. राजकी फुडाऱ्यांच्यो पूत, धुवो गोंयच्या राजकारणांत आतां मेरेन उणे संख्येन आयल्यात. फुडारांत तेंच चित्र उरतलें अशें ना, सवकासायेन गोंयचें राजकारण बदलता. उंचेले शिक्षण घेतिल्ले, राजकारणांतलें वायट, बरें कळपी उद्देजकय राजकारणांत येतात तेन्ना तांकां पंचायत, जिल्हो, नगरपालिका पांवड्यार वावर करपाक कळपाक जाय.
गाडयांनी भोंवचे परस चलत लोकां मेरेन वचपाची, कार्यावळींतल्यान लोकांची वळख करून घेवपाची संवय राजकारणांत देंवतना करपाची गरज आसा. मतदार बदलता, नगरसेवक, आमदार गांवांतलो, शारांतलो, मतदारसंघांत रावपी आसल्यार तांकां मतदारांचो तेंको मेळटा. वेंचणूक जिखतल्यांनी मतदारांक एकदांच मेळपाचे दीस उणे जायत आसात, मतदारांचेर येवपी प्रसंगा वेळार जो लोकप्रतिनिधी पावता तो अॅण्टी इनकम्बन्सी वातावरणांतय जिखूंक शकता. पिराय वाडत वता तशें राजकारण्यांनी अळंग कुशीक सरून आपल्या राजकी उत्तराधिकाऱ्याक मतदारसंघांत वेंचणुके खातीर स्वप्रशिक्षीत करचें पडटलें.
रितेशाक विधानसभा वेंचणूक, वेंचणुकेंतल्या राजकारणाची म्हायती आसा. नगरसेवक, नगराध्यक्ष म्हणून ताणें आपलें अस्तित्व दाखोवन दिलां. कोण इश्ट, कोण दुस्मान हें ताका खबर आसा. कांय वेळार दुस्मानय इश्ट जातले, इश्ट काळखांत पयशे मेजतले पूण मतदारां मेरेन ते पावतले? हें सांगपी ज्येश्ठ भाजपा फुडारी रितेशा बराबर आसतलेच, तांकां रितेशा इतलोच आपल्या राजकी फुडाराचो, पक्षाचो हुस्को आसा. भाजपाची शक्त मगो खातीर वाडटली, फुडाराची ती वाट थारतली.

सुहासिनी प्रभुगांवकार
9881099260