फोंडें पोटवेंचणुकेंत आरजीचो उमेदवार ना

भांगरभूंय | प्रतिनिधी

पणजी : भाजपाक हारोवपा सयत गोंयचें हीत सांबाळपाचे नदरेन फोंडें पोटवेंचणुकेंत उमेदवार न दवरपाचो निर्णय आरजीन घेतला. पोटवेंचणुकेंत आमी उमेदवार दवरिनासतना काँग्रेसीक तेंको दितले, अशें आरजीचे मुखेली मनोज परब हांणी पत्रकार परिशदेंत सांगलें. उमेदवार जाहीर करतना चर्चा करूंक नाशिल्ल्या कारणान तांणी काँग्रेसीचेर खर टिका केली. फुडाराक काँग्रेसीन आरजीक गृहीत धरचे न्हय, अशी शिटकावणी लेगीत आरजीन दिल्या.

इतले मजगतीं, भाजपाचे उमेदवार रितेश नायक आनी काँग्रेसीचे उमेदवार डॉ. केतन भाटीकार हे आयज (सोमारा) उमेदवारी अर्ज दाखल करतले.

फोंडें मतदारसंघात पोटवेंचणुके खातीर 9 एप्रीलाक मतदान जातलें आनी 4 मेक मतमेजणी जातली. पोटवेंचणुकेंत उमेदवार दवरचो काय ना, हे विशींचो निर्णय घेवपा खातीर आरजीची शेनवारा दीसभर बसका जाली. फोंडें मतदारसंघांत आरजीचे अस्तित्व सिद्ध करपा खातीर वेंचणूक लडोवपाचो विचार भोवसंख्य पदाधिकाऱ्यांनी उक्तायलो. उमेदवारी जाहीर करचे पयलीं काँग्रेसीन आरजी कडेन चर्चा करूंक ना म्हूण तिडक लेगीत उक्तायली. तरी लेगीत भाजपाक हारोवपा खातीर आनी गोंयच्या हिताचो विचार करून उमेदवार न दवरपाचो निर्णय पक्षान घेतला. भाजपाक हारोवपा खातीर उमेदवार जाहीर करचे पयलीं काँग्रेसीन आरजी कडेन चर्चा करपाची गरज आशिल्ली. मात उमेदवार जाहीर केले उपरांत तांणी चर्चेचो रकाद धाडलो. काँग्रेसीची ही कृती अयोग्य थारता, अशें मनोज परब हांणी म्हणलें.

विधानसभा वेंचणुके खातीर काँग्रेसीन आरजीक गृहीत धरपाक जायना, अशी शिटकावणी मनोज परब हांणी दिल्या.

युती विशीं निर्णय घेवपा खातीर समिती

येता ते विधानसभा वेंचणुके खातीर युती विशीं निर्णय घेवपा खातीर आरजी पक्ष समिती स्थापन करतलो. ही समिती हेर पक्षां कडेन चर्चा करपा सयत निर्णय घेतली, अशें आरजीचे आमदार विरेश बोरकार हांणी सांगलें. फोंडें पोटवेंचणुके उपरांत हेर पक्षां कडेन युती विशीं चर्चा सुरू जातली. युती विशींचो निर्णय घेवपा खातीर वेळेची मर्यादा घालतले, अशें विरेश बोरकार हांणी सांगलें.

आयज उमेदवारी अर्ज भरतले

वेंचणूक आयोगा कडल्यान 15 मार्चाक वेंचणुकेची तारीख जाहीर जाल्ली आसली तरी ताचे पयलीं सावन इत्सुकांनी प्रचाराक सुरवात केल्ली. भाजपाचे उमेदवार रितेश नायक, काँग्रेसीचे डॉ. केतन भाटीकार आनी आपाचे गीतेश नायक हांचो प्रचार नेटान सुरू आसा.

भारतीय जनता पक्षा वतीन उमेदवारी खातीर रितेश नायक आनी विश्वनाथ दळवी हीं दोन नांवां धाडिल्लीं. संवसार पाडव्या दिसा भाजपान रितेश नायक हांकां उमेदवारी जाहीर केली. हाका लागून उमेदवारी खातीर इत्सूक आशिल्ले विश्वनाथ दळवी आनी तांच्या कार्यकर्त्यां मदीं निरशेवणी निर्माण जाली. आतां विश्वनाथ दळवी हांंणी लेगीत भाजप उमेदवार रितेश नायक हांकां तेंको जाहीर केला. मुख्यमंत्री डॉ. प्रमोद सावंत हांचे कडेन चर्चा केले उपरांत आपणे हो निर्णय घेतलो, अशें विश्ननाथ दळवी हांणी स्पश्ट केलें.

आपलो प्रचार नेटान सुरू आसा. काँग्रेसीचे पदाधिकारी आनी सगले कार्यकर्ते म्हजे खातीर वावर करतात, अशें काँग्रेसीचे उमेदवार डॉ. केतन भाटीकार हांणी सांगलें.

फोंडें पोटवेंचणुकेंत उमेदवार न दवरपाच्या आरजीच्या निर्णयाक हांव तेंको दिता. आरजीच्या ह्या निर्णयाक लागून भाजपाक हारोवपा खातीर काँग्रेसीक बळगें मेळटलें.

माणिकराव ठाकरे, प्रभारी, काँग्रेस