भांगरभूंय | प्रतिनिधी
मतदारांची भेट घेवपाक उमेदवारांचें प्राधान्य
भांगरभूंय । प्रतिनिधी
फोंडें: फोंडें पालिका वेंचणुकेच्या प्रचाराक नेट येवपाक लागला. प्रभाग 2, 9 आनी 15 त थेट लडत जातली. ते भायर प्रभाग 5, 8, 11 आनी 14 त तिरंगी, प्रभाग 3, 6 आनी 12 त चौरंगी जाल्यार प्रभाग 1 आनी 4 त पंचरंगी लडत जातली. सगळ्या उमेदवारांनी दरेका मतदाराची भेट घेवन प्रचार करपाक प्राधान्य दिलां. मात फोंडें नागरीक समितीचे (भाजपा) उमेदवार रितेश नायक आनी रॉय नायक हांच्या प्रभागा कडेन सगळ्यांनी नदर दवरल्या.
फोंडें मतदारसंघाचे आमदार तशेंच शेतकी मंत्री रवी नायक हांचे पूत रितेश नायक प्रभाग 5 त जाल्यार रॉय नायक प्रभाग 1 तल्यान वेंचणूक लडयता. प्रभाग 1त रॉय नायक हाचे आड राजेंद्र नागवेंकार, ज्योती कुलकर्णी, तुषार उर्फ लवलेश कवळेंकार आनी नंदकुमार डांगी वेंचणूक लडयतात. पंचरंगी लडत आशिल्ल्यान प्रभागांत मतांचें विभाजन जावपाची शक्यताय आसा. मत विभागणेचो फायदो घेवपाचो यत्न सगळे उमेदवार करतात.
प्रभाग 5 त रितेश नायक वेंचणूक लडयता. ह्या प्रभागांत रायझींग फोंडेंचे सुशांत कवळेंकार आनी श्रावण नायक रिंगणांत आसात. तिरंगी लडत आशिल्ल्यान चुरस निर्माण जाल्या. मंत्री रवी नायक हांचो व्हड समर्थक सत्यवान नायक हांचो पूत श्रावण नायक हांकां ह्या प्रभागांत तरणाट्यांचो तेंको मेळपाक शकता. केतन भाटीकार हांचो तेंको आशिल्ले सुशांत कवळेंकार लेगीत ह्या प्रभागांत वळखीचे आशिल्ल्यान वेंचणुकेंत अदीक चुरस निर्माण जावपाची शक्यताय आसा.
फोंडें मतदारसंघांत फाटल्या कांय वर्सां सावन रवी नायक हांचो शेक आसा. ताका लागून हे वेंचणुकेंत तांची भुमिका खूब म्हत्वाची थारतली. फाटले पालिका वेंचणुकेंत रायझींग फोंडेंचे केतन भाटीकार हांच्या मार्गदर्शना खाला 7 उमेदवार जिखून आयिल्ले. ताका लागून हे खेपेय तांची भुमिका म्हत्वाची थारपाचीं चिन्नां आसात.
प्रभागांक लागून मतदार घुस्पला…
फोंडें पालिका वेंचणूक हे खेपे खुबूच चर्चेंत येवपाचीं चिन्नां दिसपाक लागल्यांत. हाचें कारण म्हणल्यार प्रभागांची फेररचना वेवस्थीत जावंक नाशिल्ल्यान मतदार घुस्पागोंदळांत सांपडटल्यात. कांय मतदारांक आपलो प्रभाग खबर ना. ताका लागून हे खेपे मतदान उणें जावपाची शक्यताय कांय मतदार उक्तायतात. तेच वांगडा प्रभागाची फेररचना वेवस्थीत जावंक नाशिल्ल्यान फुडारांत जिखून आयिल्ल्या उमेदवाराक लेगीत उदरगत करतना खूबश्यो आडखळी येतल्यो, अशी चर्चा मतदारां मदीं चल्ल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
