भांगरभूंय | प्रतिनिधी
पणजीः फोंडें पालिकेच्या वाठारांतल्या एका इमारतींतल्या फ्लॅटांत उदक आनी वीज जोडणी खातीर पालिकेच्या नांवान बनावट एनओसी जारी केल्ल्याचे प्रकरण मुखार आयलां. ह्या प्रकरणांत फोंडें पुलिसांनी शुक्रारा नगरसेवक शिवानंद सावंत हाका अटक केली. ही घडणूक उजवाडाक आयले उपरांत पालिकेंत बोवाळ जाला, आनी बनावट कागदपत्रांचे हे दुसरे प्रकरण आशिल्ल्याचे उक्तें जालां.
सिल्वानगरच्या रोझी मार्था रेगो हिणें कागाळ केले उपरांत ही गजाल उजवाडाक आयली. रेगो हांच्या घराच्या वयल्या माळ्यार बिराडाक रावप्यान वीज आनी उदकाचें कनेक्शन घेतिल्लें. पूण हे खातीर रेगोन स्वता अर्ज करुंक नाशिल्लो. तरी बिराडाक रावप्यान बनावट कागदपत्रांचो वापर करून हीं कनेक्शनां मेळयल्यांत अशें उक्तें जालें. उपरांत रेगोन म्हायती हक्क कायद्या खाला म्हायती मेळयली आनी पालिकेंत कागाळ केली. पालिकेन केल्ले चवकशेंतल्यान ह्या अर्जांत जोडिल्ली कागदपत्रां बनावट आशिल्ल्याचें स्पश्ट जालें. ह्या कागदपत्रांचेर पालिकेचो अभियंतो उदय देसाय हांची बनावट सय आशिल्ली. ह्या प्रकरणांत नगराध्यक्ष आनंद नायक हांणी पालिके वतीन चवकशी सुरू करपाचे अशें सांगलें. पुलिसांच्या चवकशे उपरांत ह्या बनावट एनओसी प्रकरणांत नगरसेवक शिवानंद सावंत हांचो आस्पाव आशिल्ल्याचें कळ्ळें. उपरांत ताका अटक केली.
हाचे आदीं 9 जानेवारीक नगरसेवक शिवानंद सावंत हाका अटक केल्ली. त्या वेळार तांणी पालिका मुखेल अधिकारी योगीराज गोसावी हांची फट सयीचो वापर करुन फोंडेंच्या एका मनशाक बनावट उत्पन्न प्रमाणपत्र दिल्लें. उपरांत जामीनाचेर ताची सुटका जाल्ली. पुलीस निरिक्षक विजयनाथ कवळेकार हांच्या मार्गदर्शना खाला पुलीस उपनिरिक्षक आशीष वेळीप सध्याच्या प्रकरणाची फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
