भांगरभूंय | प्रतिनिधी
फोंडें: फोंडें तशेंच धारबांदोडें म्हालांत सोमारा अयोध्येंतल्या रामलल्लाची मुर्ती प्रतिश्ठापना कार्यावळ श्रीरामाच्या जयघोशांत मनयली. दरेक देवळांनी आयोजीत केल्ले कार्यावळीक लोकांनी हाजीर रावन तिर्थप्रसादाचो तशेंच महाप्रसादाचो लाव घेतलो. ताका लागून विवीध देवळांनी लोकांची गर्दी दिसून आयली.
अयोध्येंतल्या रामलल्लाची मुर्ती प्रतिश्ठापना निमतान फोंड्यां हिंदू सांस्कृतीक न्यासा वतीन खासा कार्यावळीचें आयोजन केल्लें. राजीव गांधी कला मंदिराच्या सभाघरांत ही कार्यावळ जाली. कार्यावळींत अनंत काजरेकार हांचे हस्तुकीं दिवली पेटोवन शुभारंभ केलो. ह्या वेळार जयंत मिरींगकार, संदीप निगळये, मनोज गांवकार, सुहास वझे, मशाल आडपयकार, अॅड. शैलेंद्र नायक आनी हेर मानेस्त हाजीर आशिल्ले.
ताचे पयलीं वयल्या बाजारांतल्या लोकमान्य मल्टिपर्पज सोसायटी सावन दिंडी काडली. उपरांत गोंयच्या कलाकारांनी गीत रामायण गायलें. हातूंत मुग्धा गांवकार, अंबर मिरींगकार, प्राची जठार, ऋषिकेश साने आनी गौरांगी मिरींगकार हांणी वांटो घेतलो.
फोंडें तशेंच उसगांव वाठारांत सोमारा सकाळीं श्रीरामाच्यो घोशणा दिवन मिरवणुको काडल्यो. फर्मागुडी सावन सुरू जाल्ले मिरवणुकेक शेंकड्यांनी लोकांनी वांटो घेतलो. फर्मागुडी ते कुर्टी, हवेली, नागझर, वयलो बाजार आनी निमाणें पोरण्या बस स्टॅण्डार मिरवणुकेची सांगता जाली. स्थितीचेर लक्ष दवरपा खातीर खासा पुलीस तैनात केल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
