भांगरभूंय | प्रतिनिधी
फाटल्या देड म्हयन्यांत 5 अपघात, चवगांक मरण, 10 परस अदीक जखमी
भांगरभूंय । प्रतिनिधी
फोंडें: फोंडें आनी धारबांदोडें म्हालांत फाटल्या देड म्हयन्यांत वट्ट 5 अपघातांनी 4 जाणांक मरण आयलें. जाल्यार 10 परस अदीक जखमी जाले. दोनूय म्हालांत दरेकी दोन अपघातांत मरण आयिल्ल्याची नोंद आसा. तातूंत फोंडें म्हालांत 10 दिसांनी दोगांक मरण आयिल्ल्याची नोंद जाल्या. अशीर रस्ते आनी घातक वोल्तांचेर अपघात जाल्यात. ह्या म्हालांतल्या रस्त्यांची दुरुस्ती करप सामकें गरजेचें जालां.
धारबांदोडें म्हालांत जानेवारींत अनमोड घाटांत टेंपोचो धपको कठड्याक बसून चालकाक सुवातेचेरूच मरण आयिल्लें. जाल्यार सुकतळी- मोल्यां मोटारीचो धपको बसून कुळेच्या दुचाकी चालकाक मरण आयिल्लें. ते उपरांत फोंडें म्हालांत फर्मागुडी वाठारांत मोटार, टँकर आनी दुचाकी हांचे मदीं जाल्ल्या अपघातांत दुचाकी चालकाक सुवातेचेरूच मरण आयिल्लें. ते उपरांत फक्त 10 दिसांच्या अंतरान कुंडय फाटल्या बुधवारा नुस्तें व्हरपी ट्रक दुकानांत घुशिल्ल्यान खरेदी खातीर आयिल्ल्या एका बिगर गोंयकाराक मरण आयलें. ह्या अपघातांत हेर पांच जाण जखमी जाले. मोल्यां फाटल्या मंगळारा इनोव्हा मोटारीच्या चालकाचो दोळो लागिल्ल्यान उरफाटे दिशेन येवपी बशीक धपको बसून 6 जाण जखमी जाल्ले.
बाणास्तारी ते अनमोड घाटांतल्या गोंय हद्दी मेरेन राष्ट्रीय म्हामार्ग चारपदरी करपाची खर गरज आसा. राष्ट्रीय म्हामार्गाचेर बसपी हेडग्या गोरवांक लागून लेगीत हे आदीं खूबशे अपघात जाल्यात आनी तातूंत खूबशा जाणांक जीव वगडावचो पडला. चड करून संजीवनी साकर कारखान्याच्या मुखार आशिल्ल्या रस्त्याचेर हेडग्या गोरवांचो त्रास दिसपटे वाहनचालकांक सोंससो पडटा. तातूंत खांडेपारा नव्यान बांदिल्ल्या पुलाच्या जोडरस्त्याचें काम अर्दवट आशिल्ल्या ह्या वाठारांत अपघाताची माळ फाटल्या कांय वर्सां सावन चालू आसा. तातूंत 2021 त केंद्रीय गृहमंत्री अमीत शाह संजीवनी साकर कारखान्याच्या वाठारांत येवपाचे आशिल्ले. त्या वेळार गुगल मॅपांत बदल केल्लो. पूण देड वर्स जालें तरीय अजून गुगल मॅप बदलूंक नाशिल्ल्यान खांडेपार जंक्शनाचेर परतून परतून अपघात जातात. ह्या वाठारांत सप्तकांत 3-4 अपघात जाताच जातात. जंक्शना लागसार हायस्कूल आशिल्ल्यान दनपारच्या वेळार विद्यार्थ्यांची संख्या चड आसता. ताका लागून व्हड दुर्घटणा घडपाची शक्यताय थळावे लोक उक्तायतात.
बुधवारा मानसवाडो- कुंडय जाल्ल्या अपघाता उपरांत थळाव्या लोकां मदीं भिरांतीचें वातावरण पातळ्ळां. फाटल्या कितल्याशाच वर्सां सावन ह्या वाठारांतल्या दुकानांनी गाडयो घुसपाचे प्रकार घडपाक लागल्यात. ह्या वाठारांत गरजेचे उपाय येवजण करपाची मागणी लोक करतात, पूण सरकार मात ताका प्रतिसाद दिना. ताका लागून फुडारांत सुरक्षे खातीर रस्त्यार देंवपा बगर दुसरो पर्याय आसचो ना, अशेंय मत ह्या वाठारांतल्या लोकांचें जालां.
फोंडें ते मोलें मेरेनच्या रस्त्याचेर बसपी हेडगी गोरवां अपघातांत आमंत्रण दितात. हे आदीं तांचे खातीर जाल्ल्या अपघातांनी खूबशा दुचाकी चालकांक मरण आयलां. फुडारांत हे अपघात आडावपा खातीर सरकारान ठोस उपाय येवजण करपाची गरज आसा, अशें प्रभाकर गांवकार ह्या दुचाकी चालकान सांगलें.
खांडेपारच्या घातक जंक्शनाचेर जावपी अपघातांत सरकार पुराय जापसालदार आसा. कारण थंय नेमान अपघात जावन ते आडावपा खातीर कसलीच उपाय येवजण करिना, अशें खांडेपारच्या भानुदास नायक हांणी सांगलें.
वाहन चालकांनी नेम पाळचेः पुलीस निरिक्षक
वाहन चालक येरादारी नेम पाळिनात, हे खातीर अपघात जातात. दरेका वाहन चालकाक बेगीन वचपाची गडबड आसता. अपघात आडावपा खातीर दरेका वाहन चालकान सादुरकाय बाळगुपाक जाय, अशें फोंडें येरादारी पुलीस निरिक्षक कृष्णा सिनारी हांणी सांगलें.
अशीर रस्त्यांक लागून अपघातः वामन नायक
रस्त्याचेर वाडिल्ली गाडयांची संख्या आनी अशीर रस्त्याक लागून अपघाताचे प्रमाण वाडटा. वाहन चालकांनी लेगीत येरादारी नेम पाळचे. गतीन वाहनां चलोवचे बदला सावकासायेन चलोवपाची चड गरज आसा, अशें बांदोडेंचे पंच वामन नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
