भांगरभूंय | प्रतिनिधी
पणजी ः राज्यांतलो रानां हक्क कायदो 2006 खाला प्रलंबीत आशिल्ल्या प्रकरणां बेगीन निकालांत काडून नागरिकांक थाकाय दिवपा खातीर प्रशासन खर पावलां उबारता. फोंडें, धारबांदोड्या आनी केपें ह्या तीन तालुक्यांतल्या 350 परस चड प्रकरणांचेर निर्णय घेतलां.
फोंडें 60 दावे निकालांत
फोंडे उपजिल्लोधिकारी कार्यालयांत ‘रानां हक्क कायदो 2006’ खाला एक दिसाचें खाशेलें शिबिर आयोजीत केल्लें. ह्या शिबिरांत वट्ट 60 प्रकरणांचो थेट निर्णय जालो. फोंडें तालुक्यांत वट्ट 259 प्रकरणा प्रलंबीत आसात, तातूंतली 129 प्रकरणां जिल्लो पातळेचे समिती कडेन पयलींच धाडिल्ली. उरिल्ल्या 130 प्रकरणांच्या कागदपत्रांची तपासणी ह्या शिबिरांत जाली.
उपजिल्लोधिकारी शुभम नायक हांच्या अध्यक्षते खाला हें शिबिर जालें. ह्या वेळार अतिरिक्त जिल्लोधिकारी श्रीनेत कोठावळे, मामेलदार राजेश साखळकार आनी गट विकास अधिकारी अश्विन देसाय हांणी शिबिरांत मार्गदर्शन केलें. बेतोड्यां, बोरी, कोनशे, गांजे, शिरोड्यां, उसगांव आनी निरंकाल ह्या पंचायत वाठारांतल्या अर्जदारांनी ह्या शिबिरांत वांटो घेतिल्लो.
दावे डिसेंबर पयलीं निकालांत
धारबांदोड्या तालुक्यांत उपजिल्लोधिकारी निलेश धायगोडकार हांच्या मार्गदर्शना खाला दावेदारांची खाशेली बसका जाली. उरिल्ल्या सगल्या प्रकरणांची औपचारीकता पुराय करून डिसेंबर 2025 पयलीं सगले प्रलंबीत दावे निकालांत काडटले अशें धायगोडकार हांणी सांगलें. मजगतीं, केपे तालुक्यांतय उपजिल्लोधिकारी (महसूल) ब्रुसली क्वाड्रोस आनी केपेंचे उपजिल्लोधिकारी मनोहर करेकार हांच्या हाजिरेंत जाल्ले खाशेले बसकेंत सुमार 300 दावे निकालांत काडले.
प्रोजेक्ट ‘अधिकार’ खाला मोहिम
ही सगली प्रक्रिया राज्य सरकाराच्या ‘प्रोजेक्ट अधिकार’ उपक्रमाचो एक भाग आसा, जाचो हेत डिसेंबर 2025 पयलीं सगल्या पात्र अर्जदारांचे दावे निकालांत काडपाचो आसा.उरिल्ल्या प्रकरणां खातीर गरजेची कागदपत्रां 15 दिसां भितर सादर करपाचें आवाहन प्रशासनान केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
