भांगरभूंय | प्रतिनिधी
फोंडेंः राज्यभर लोक उमेदीन दिवाळी मनयतना सिल्वानगरांतल्या अन्सारी कुटुंबांत एक दुख्खद घडणूक घडली. तांचे सान चलयेक अपघातांत मरण आयलें. सायकल चलोवपी हे आठ वर्सांचे चलयेक बोलेनो गाडयेन धपको दिल्ल्यान गंभीर जखमी जाली. तिका उपचारा खातीर हॉस्पिटलांत व्हेली. पूण दोतोरांनी तिका मरण आयिल्ल्याचें सांगलें.
ही दुख्खद घडणूक दिवाळेच्या दिसा फोंडेंच्या सिल्वानगर वाठारांत घडली. शाळांक सुटी आशिल्ल्यान आठ वर्सांची हिमा सकाळीं 10:30 वरांच्या सुमाराक भितरल्या रस्त्यार सायकल चलयताले. कांय वेळा उपरांत थंय एकलो आयलो आनी ताणें बोलेनो गाडी रिव्हर्स घेतली. ती ल्हान चली ताका दिसली ना. फाटल्यान येवपी मोटारीन सायकलीक धपको दिलो. ती ल्हान चली सकयल पडली. तिचे तकलेक खर जखम जाली. उपरांत कांय जाणांनी तिका खाजगी गाडयेंतल्यान फोंडेंच्या उपजिल्हो हॉस्पिटलांत व्हेली. पूण थंयच्या दोतोरांनी तिका मरण आयिल्ल्याचें सांगलें.
म्हायती मेळ्ळे उपरांत फोंडें पुलिसांनी घडणूक सुवातेर धांव घेतली आनी पंचनामो केलो. पुलिसांनी मोटार ड्रायव्हरा आड गुन्यांव नोंद करून फुडली चवकशी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
