फोंडें- उसगांव वाठारांत बिबटो आनी गव्यांचें धुमशेण

भांगरभूंय | प्रतिनिधी

फोंडें, प्रतिनिधी ः फाटल्या कांय दिसां सावन उसगांव वाठारांत बिबटो आनी गव्यांनी मनशांच्या वसणुकांनी भितर सरून धुमशेण घालें. तिराळ- उसगांवां चार दिसां आदीं अचकीत रस्त्यार आयिल्ल्या गव्याक स्कुटरीचो धपको बसून आवय आनी पूत जखमी जालो. जाल्यार फाटल्या २- ३ दिसां सावन बिबट्यांनी सुण्यांची शिकार करपाक सुरवात केल्या. हांतूत रान खात्यान लक्ष दिवपाची मागणी थळाव्या लोकांनी केल्या.
चड म्हायती प्रमाण, तिराळ- उसगांवां ४ दिसां आदीं अचकीत रस्त्यार आयल्या गव्याक स्कुटरीचो धपको बसून रमिता रमेश नायक आनी तिचो पूत आदर्श रमेश नायक जखमी जाल्ले. दोगांचेरुय हॉस्पिटलांत उपचार केले उपरांत घरा धाडल्यांत. पूण आजूनय उपचारा खातीर तांकां हॉस्पिटलांत व्हरचें पडटा. स्कुटरीचें व्हड प्रमाणांत लुकसाण जालां. गांवच्या रस्त्याच्या ओलतांचेर अचकीत मदींच गवें दिसतात हाका लागून आनीक अपघात जावपाची शक्यताय आसा.

फाटले २- ३ दीस तिराळ हांगा मनशाच्या वसणुकांनी दिसाचो बिबटो भोंवतना दिसता. दनपारां एका बिबट्यान मनशाच्या वसणुकेंत भितर सरुन पाळीव सुण्यांची शिकार केली. हाका लागून ह्या वाठारांत भंयाचे वातावरण पातळ्ळां. कांय दिसां आदीं उसगांवच्या हायस्कुला लागसार रस्त्यार बिबटो बशिल्लो दिसलो. उपरांत पालवाडो आनी टाकवाडो वाठारांत तो दिसलो. सध्या बिबट्याक तिराळ वाठारांत सुण्यांची शिकार करपाक मेळटा देखून तो थंय भोंवत रावता असो दुबाव आसा. रान खात्यान वाठारांत गस्त घालून गव्याचो आनी बिबट्याचो बंदोबस्त करपाचो अशें सुरेश नायक हांणी सांगिल्लें.
तिराळ, पालवाडो आनी टाकवाडो वाठारांत बिबट्यांचीं धुमशेणां चालू आसात. गवेय भोंवतना दिसतात. हाका लागून फोंडें रान अधिकारी वाठारांतले परिस्थितीचेर नदर दवरुन आसात. रान खात्याच्या आरएफओच्या फुडारपणा खाला अधिकारी देऊ शेटकार आनी हेर कर्मचाऱ्यांनी गांवांनी वचून लोकांक सादूर करपाचे यत्न सुरू केल्यात.