भांगरभूंय | प्रतिनिधी
फोंडें: फोंडें शार स्मार्ट सिटी करपाचें सपन सर्गेस्त रवी नायक हांचें आशिल्लें. तांचें हें सपन रोखडेंच पुराय करपाचो यत्न भाजपा सरकार करतलें. तेच बराबर फोंडें उपजिल्हो हॉस्पिटलाक जिल्हो हॉस्पिटलाचो दर्जो दिवपाचो यत्न करतले अशें मुख्यमंत्री डॉ. प्रमोद सावंत हांणी सांगलें.
नागझर-कुट्टी हांगा महादेव देवस्थानाच्या प्राकारांत आयोजीत केल्ले कोनसो बसकेंत मुख्यमंत्री डॉ. प्रमोद सावंत उलयताले. ह्या वेळार नगरसेवक विश्वनाथ दळवी, भंडारी समाजाचे आदले अध्यक्ष अशोक नायक, देवस्थान समितीचे अध्यक्ष निळकंठ नायक आनी रमेश नायक माचयेर हाजीर आशिल्ले.
फोंडें पोटवेंचणुकेंत मतदारांनी भाजपाक मतदान करून सरकाराक उदरगतीच्या कामां खातीर सहकार्य करपाची गरज आसा. काँग्रेस आनी आम आदमी पक्ष गोंयचो विकास करूंक शकनात. प्रधानमंत्री नरेंद्र मोदी हांच्या फुडारपणा खाला भाजप सरकारान गोंयचो चारूय दिकांनी विकास केला. ताका लागून खंयच्याय आस्वासनाक बळी पडनासतना मतदारांनी भाजप उमेदवार रितेश नायक हांकां मतदान करचें अशें आवाहन मुख्यमंत्री डॉ. प्रमोद सावंत हांणी केलें.
नगरसेवक विश्वनाथ दळवी हांणी ह्या वेळार उलयतना सांगलें, मुख्यमंत्री डॉ. प्रमोद सावंत हांच्या फुडारपणा खाला भाजप सरकारान फोंडें मतदारसंघाचो विकास केला. उरिल्लो विकास करपा खातीर भाजपा उमेदवाराक वेंचून दिवप मतदारांच्या हिताचें आशिल्ल्याचें तांणी म्हणलें.
अशोक नायक हांणी सर्गेस्त रवी नायक हांणी फोंडें मतदारसंघाचो केल्लो विकास भावी पिळगी विसरूंक शकची ना. सर्वसामान्य लोकांक सेगीत न्याय दिवपाचो यत्न रवी नायक हांणी केलाे. ताका लागून रवी नायक हांचे सपन पुराय करपा खातीर मतदारांनी भाजप उमेदवार रितेश नायक हांकां मतदान करून जैतिवंत करपाची गरज आशिल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
