भांगरभूंय | प्रतिनिधी
पाखें कोसळ्ळें; कृशीपणान मंडळाचे इमारतींतल्यान चलतलें काम
भांगरभूंय । प्रतिनिधी
फोंडें: सांताक्रूझ- फोंडेंच्या विभागीय शेतकी खात्याचें कार्यालयाचें पाखे शुक्रारा राती कोसळ्ळें. पोरणे इमारतीची वेळावेळार दुरुस्ती करूंक नाशिल्ल्यान पाखें कोसळ्ळें, असो दुबाव आसा. सध्या शेतकी खात्याच्या कार्यालय कृशीपणन मंडळाचे इमारतींत स्थलांतर केलां. नवी इमारत बांदी मेरेन तें कार्यालय थंयच उरपाची शक्यताय आसा.
शुक्रारा राती अचकीत इमारतीचें पाखें कोसळ्ळें. रातचो वेळ आशिल्ल्यान व्हड दुर्घटणां टळ्ळी. शेनवारा सकाळीं कर्मचारी कार्यालयांत आयले उपरांत पाखें कोसळिल्ल्याचें तांचे नदरेक पडलें. ते उपरांत कार्यालय बेतोडें रस्त्यार आशिल्ल्या कृशीपणन मंडळाचे इमारतींत स्थलांतर केलें. सध्या म्हालांतल्या सगळ्या शेतकारांक स्थलांतरीत केल्ल्या कार्यालयांत वच्चें पडटलें. शेतकी खात्याच्या कार्यालयाची इमारत पोरणी जाल्ली. थंय नवी इमारत उबारचे खातीर सगळी प्रक्रिया सुरू केल्ली. सुमार 5 कोटी रुपयां परस अदीक खर्च करून थंय नवी इमारत बांदतले. ती फायल मंजुरी खातीर मुख्यमंत्री डॉ. प्रमोद सावंत हांचे कडेन धाडून दिल्या, अशें शेतकी मंत्री रवी नायक हांणी सांगलें.
निलेश काब्राल हांणी शाराचेर लक्ष मारचेः नायक
फोंडें वाठारांत घाणयाऱ्या उदकाचेर प्रक्रिया करपी प्रकल्पाचें काम वेवस्थीत जावंक ना. ताका लागून पयल्याच पावसांत पोरणें बस स्टॅण्ड वाठारांतल्या रस्त्याचेर प्रदुशीत उदकांतल्यान वाट काडपाचो प्रसंग वाहन चालकांचेर आयलो. ताका लागून भौशीक बांदकाम मंत्री निलेश काब्राल हांणी फोंडेंच्या घाणयाऱ्या उदकाचेर प्रक्रिया करपी प्रकल्प आनी रस्त्यांची पळोवणी करपाची गरज आसा, अशें मंत्री रवी नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
