भांगरभूंय | प्रतिनिधी
पणजी: फोंडें मतदारसंघा खातीर भाजप उमेदवारा विशीं निमाणो निर्णय केंद्रीय फुडारीच घेतले. संभाव्य नांवांची शिफारस केले उपरांत पक्षाचें संसदीय मंडळ उमेदवाराचें नांव निश्चीत करतले अशी म्हायती प्रदेश भाजप अध्यक्ष दामू नायक हांणी दिली. आदले मुख्यमंत्री रवी नायक हांचे पूत रितेश नायक आनी विश्वनाथ दळवी ह्या दोन नांवांची एके बसकेंत चर्चा जाल्या, अशी म्हायती गोपांनी दिली.
प्रदेश भारतीय जनता पक्षा वरवीं रितेश नायक आनी विश्वनाथ दळवी हांच्या नांवांची शिफारस संसदीय मंडळा कडेन करतले. संंसदीय मंडळ उमेदवाराचें नांव निश्चीत करतलें. पोटवेंचणुकेची तारीख जाहीर जाले उपरांतूच भाजपचो उमेदवार जाहीर जातलो अशी म्हायती प्रदेश भाजप अध्यक्ष दामू नायक हांणी दिली. उमेदवाराच्या नांवा विशीं मात तांणी उलोवपाक न्हयकार दिलो.
आदले मुख्यमंत्री रवी नायक हांकां 14 ऑक्टोबर 2025 दिसा रातीं उसरां मरण आयलें. तांच्या मरणाक लागून फोंडें मतदारसंघाच्या आमदाराची सुवात रिती जाल्या. नेमा प्रमाण 6 म्हयन्यां भितर पोटवेंचणूक घेवप गरजेची आसा. 6 म्हयन्याचो कालावधी 15 एप्रीलाक सोंपता. हाका लागून आतां खंयच्याय खिणाक फोंडें मतदारसंघा खातीरची पोटवेंचणूक जाहीर जातली. येता त्या सप्तकांत केंद्रीय वेंचणूक आयोगा वरवी पोटवेंचणुकेची कार्यावळ जाहीर जावपाची शक्यताय आसा.
तारीख जाहीर जावंक नासली तरी राजकी पक्षां कडल्यान वेंचणुकेची तयारी सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
