फोंडेंचे आदले आमदार लवू मामलेदार हांचो बेळगांवां खून
भांगरभूंय | प्रतिनिधी
बेळगांव, प्रतिनिधी ः फोंडेंचे आदले आमदार लवू मामलेदार हांचो खडे बाजार- बेळगांवां दनपरां देडाक सुमार एका रिक्षा ड्रायव्हरा कडेन वाद जालो. ताचें रुपांतर बाचाबाचींत आनी उपरांत मारामारीत जालें. त्या रिक्षाकारान तांचेर थापट मारलें. हांतूत आमदार लवू मामलेदार हांकां मरण आयलें, अशें पुलिसांनी सांगलें. रिक्षाकाराच्या आड पुलिशेंत गुन्यांव नोंद केला.
रिक्षाकारान जाल्ल्या वादा उपरांत ते चलत हाॅटेलाच्या रिसेप्शनांत येतात आनी अचकीत कोसळटात, असो व्हिडियो व्हायरल जाला. ह्या केस्तांवा उपरांत तांकां काळजाचो आताक आयिल्ल्याचो दुबाव आसा. ते पडटकच तांकां रोखडेच जिल्हो सिव्हिल हास्पिटलांत व्हेले. पुलीस घडणूक सुवातेर हजर जावन तांणी रिक्षा ड्रायव्हराक ताब्यांत घेतलो. ताचें नांव मुकाहिद शकील जमादार अशें आसा. ताच्या बापायन सांगलें, पुतान थापट मारतकच तो मनीस हाॅटेलांत वतकच बेशुद्ध जालो आनी ताका हाॅस्पिटलांत व्हेला. मामलेदार हांची गाडी रिक्षाक घासतकच हो वाद जाल्ल्याचें पुलीस सांगतात.
लवू मामलेदार 2012 ते 2017 मेरेन फोंडें मतदारसंघांचे आमदार आशिल्ले. 2012 वर्सा जाल्ले गोंय विधानसभा वेंचणूकेंत महाराष्ट्रवादी गोमंतक पक्षाची तिकेट घेवन तांणी जैत मेळयल्लें. पूण 2017 वर्सांचे गोंय विधानसभा वेंचणुकेंत तांका काँग्रेस पक्षाच्या रवी नायक हांणी हारयिल्ले. मामलेदार तीन म्हयन्या खातीर अखिल भारतीय तृणमूल काँग्रेसीचे वांगडी आशिल्ले. पूण डिसेंबर 2021 वर्सा तांणी पक्ष सोडलो. जानेवारी 2022 वर्सा तें काँग्रेसींत आयिल्लें. ते आदले पुलीस अधिकारी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
