भांगरभूंय | प्रतिनिधी
स्मार्ट सिटी कामांचें ऑडिट करपाची मागणी
पणजी, प्रतिनिधी ः फाटलीं स वर्सां राजधानी पणजेक स्मार्ट सिटी करपाचें काम पुराय पणजी शारांत चालू आसा. पूण, हे शार स्मार्ट जावचे बदला लोकां खातीर चड त्रासदायक थारलां. फोंडकुलांक लागून पणजेचे रस्ते इबाडल्यात. हांगा रावपी वा कामां निमतान शारांत येवपी लोकांक हाचो खूब त्रास जावपाक लागला. अजून कांय कामां जावपाचीं आसात. ह्याच समस्यां विशीं आयज सकाळीं पणजी जाल्ल्या म्हापालिकेच्या बसकेंत विरोधी गटाचे नगरसेवक उयलताले.
स्मार्ट सिटी कामांचें ऑडिट करचें आनी दरेका अधिकाऱ्यांक पालिकेंत आपोवन तांची जापसालदारकी थारावची अशी मागणी विरोधी गटाच्या नगरसेवकांनी केली. ह्या मागणेक सत्ताधारी नगरसेवक गटांन तेंको दिलो. नगराध्यक्ष रोहित मोन्सेरात हांणी ह्यो मागण्यो आयकून घेतल्यो.
मजगतीं, म्हापालिका वांगड्यांनी गाडयेन पुराय शार फिरून नेमके खंय रस्ते इबाडल्यात, मुंगरल्यात, फोंडकुलां पडल्यांत, ताचो नियाळ घेवचो, असो उलो कांय पणजेकारांनी मारला. ह्या कामा खातीर नेमको कितलो खर्च जाला, ताचीय म्हायती लोकांक दिवची, अशें तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
