भांगरभूंय | प्रतिनिधी
भांगरभूंय । प्रतिनिधी
सांगें : सांगेंच्या उच्च माध्यमीक हायस्कुलाच्या पाख्याचेर माकडान उडी मारिल्ल्यान फॉल्स सिलींग पडलें. हे घडणुकेंत पांच विद्यार्थी जखमी जालें. तीन विद्यार्थ्यांक सांगेंच्या मुळाव्या भलायकी केंद्रांत उपचार करून घरा धाडले. दोन विद्यार्थ्यांचे तकलेक मार बशिल्ल्यान मडगांवच्या हॉस्पिसियो हॉस्पिटलांत दाखल केले.
मेळिल्ले म्हायती प्रमाण शुक्रारा 10 ऑक्टोबराक सकाळीं 9.15 वरांचेर कांय विद्यार्थी कार्यावळींत वांटो घेवपा खातीर येसाय मारपाक हॉलांत जमिल्ले. त्या वेळार एका माकडान झाडा वयल्यान पाख्याचेर उडी मारली आनी भितर घुसलो. पाखें आनी सिलींग हांचे मदीं खूब अंतर आसा. पाख्या वयल्यान नेटान सिलांगाचेर उडी मारिल्ल्यान सिलिंगा वांदडा माकड लेगीत भितर पडलो. तातूंत पांच विद्यार्थी जखमी जाले.
पाख्याच्या वयर दोन उदकाच्यो टांकयो आसात. त्या दोनूय टांकयांचे मदीं आनी कुशीक खूबशी उक्ती सुवात आसा. हे उक्ते सुवातेंतल्यान माकड भितर घुशिल्ल्याची म्हायती मुख्याध्यापक सुदेश नायक हांणी दिली.
हेच संबंदांत ही सुवात बंद करचे खातीर भौशीक बांदकाम खात्यान सर्व्हे लेगीत केल्लो. पूण संबंदीत खात्यान ह्या कामांत आडनदर केल्ल्यान ही घडणूक घडली अशें लोक उलयतात. वेळारूच ही वाट बंद केल्ली जाल्यार हो अनर्थ जावचोच नाशिल्लो, अशेंय ते म्हणटात.
6 म्हयन्यां पयलीच बरयल्लें पत्र : झिंगडे
माकडांनी उडयो मारिल्ल्यान सांगेंच्या सरकारी उच्च माध्यमिकाचें फॉल्स सिलींग पडिल्ल्यान विद्यार्थी जखमी जाले. हे शाळेचे दुरूस्ती विशीं शिक्षण खात्यान 6 म्हयन्यां पयलीं भौशीक बांदकाम खात्याक पत्र बरयल्लें. मात पत्र बरोवन लेगीत इमारतीचे दुरुस्ती कडेन भौशीक बांदकाम खात्यान लक्ष दिवंक ना. शिक्षण संचालक शैलेश झिंगडे हांणी ही म्हायती दिली. सांगेंच्या सरकारी उच्च माध्यमिकाचे कुशीक झाडां आसात. ह्या झाडांचेर माकड उडयो मारतात. हाची सगळी कल्पना शिक्षण खात्याक आसली. हाका लागून दुरुस्तीची मागणी केल्ली. उच्च माध्यमिकाच्या पाख्याक नळ्या बदला पत्रे घालप योग्य थारतले. अत्याधुनीक दर्जाचे पत्रे घातले जाल्यार माकडांक लागून लुकसाण जावचें ना, अशीय सुचोवणी केल्ली, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
