भांगरभूंय | प्रतिनिधी
-आमचेर विस्वास दवरातः आमदार संकल्प आमोणकारभांगरभूंय प्रतिनिधीः मुरगांवचे आमदार संकल्प आमोणकार हांणी मुरगांवच्या लोकांक आमचेर विस्वास दवरचो अशें आवाहन केलें. पूण, जांकां कसलोय दुबाव वा भंय आसा तांणी शेनवारा (11 तारखेक) सांजवेळा 4 वरांचेर रवींद्र भवनांत येवचें, थंय मुख्यमंत्री डॉ. प्रमोद सावंत तांच्या सगळ्या प्रस्नांक जाप दितले अशें आमोणकार हांणी स्पश्ट केलें.
बोगदा-सडा वाठारांत 31 ऑक्टोबर, 1 आनी 2 नोव्हेंबर तीन दीस फॉर्मूला 4 आयोजीत केला. पूण फॉर्मूला 4 विशीं म्हायती मेळनाशिल्ल्यान आनी वेगवेगळ्या उलोवपाक लागून तांच्या मनांत कांय दुबाव निर्माण जाला. कांय समस्या निर्माण जाल्यात, देखून मुरगांवच्या समाजीक वावुरप्यांनी आनी कांय नगरसेवकांनी मुरगांवच्या उपजिल्होधिकारी आनी दंडाधिकाऱ्याअक निवेदन सादर केल्या.
आमदार आमोणकार हांणी फॉर्मूला-4 संबंदी स्पश्टीकरण आनी म्हायती दिल्या. हे विशीं कांय जाण नागरिकांच्या मनांत भंय निर्माण करतात. लोकांक चुकीची वाट दाखयात. म्हणून गोंदळ जाला. लोकांकय फॉर्मूला-4 विशीं खबर नाशिल्ल्यान ते भियेतात.
पूण फॉर्मूला-4 ही एक प्रतिश्ठीत सर्त. हेर राज्यांनी ही कार्यावळ आपल्या राज्यांत जावपाची इत्सा उक्तायिल्ली. मात गोंयाक हो मान मेळ्ळा. हाका लागून गोंय आनी मुरगांव हें नांव संवसारीक नकाशांत येतलें. हांगा कित्याकूच हात जावचें ना वा लुकसाण जावचें ना.
देवूळ आनी मसणभुंये विशीं जे प्रस्न उप्रासतात ते चुकीचे आसात. विरोधकांनी कारणा बगर विरोध करचो न्हय अशें आवाहन ताणें केलें. नागरीकांच्या मनांत कसलेय दुबाव आयल्यार ते निवळ करपाक आमी तयार आसात. ही कार्यावळ कितली म्हत्वाची आसा हाची म्हायती दिवपाक मुख्यमंत्री हांगा येतले.
त्या वेळार सगळ्यांनी रविंद्र भवनांत येवंक जाय. विरोधकांनी थंय येवचें अशें आवाहन केलें. हांगाचे तरणाटे हे कार्यावळी खातीर उत्सुक आसात. देखून विरोधकांनी हे घडणुके विशीं लोकांक चुकीची वाट दाखोवप बंद करचें. तीन दिसांची ही कार्यावळ दर दिसा फकत तीन वरां खातीर आसतली.
ह्या वेळार बोगद्यांतल्या लोकांक कांय प्रमाणांत असुविधा जातली. पूण तांकां पर्यायी मार्ग दिवंक मेळटा काय ना हाची चवकशी सुरू आसा. तशेंच फॉर्मूला-4 खातीर जी मुळावी बांदावळ बांदतले ताचो फायदो मुरगांवच्या लोकांक जातलो. रस्ते रुंद करतले. हांगा फॉर्मूला-4 आंतरराष्ट्रीय पांवड्यार जाता देखून ताका येवकार दिवचो आनी ताचो फायदो घेवपाक जाय अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
