भांगरभूंय | प्रतिनिधी
वास्को: फॉर्म्युला -4रेसीक आमचो विरोध ना, तशेंच जंय ही रेस घेतले ती सुवात रेसी खातीर योग्य ना. हाका लागून लोकांचे सुरक्षीततायेचो प्रस्न निर्माण जातलो. तशेंच हे रेशी संबंदी विवीध परवाने, परवानग्यो लागतात, त्यो घेतल्यात काय नात हे विशीं कसलीच म्हायती उपलब्ध ना. ह्या प्रकरणांत थळाव्या प्रशासनाक तशेंच नागरिकांक विस्वासांत घेवंक नाशिल्ल्याचो दावो आदले नगराध्यक्ष शेखर खडपकार हांणी बुधवारा केलो. दाट लोकवस्तीचे सुवातेर ही रेस घेवपाक मेळना. ती घेवप बेकायनेशीर आशिल्ल्याचें तांणी म्हणलें. मजगतीं हे रेसी संबंदी बिरेस्तारा सांजेवेळार बोगदा हांगा रावप्यांची बसका जातली. ते बसकेंत घेवपी निर्णया उपरांत फुडली कारवाय जातली. तशेंच वेळा प्रसंगार रस्त्याचेर बसप, न्यायालयात हे रेस संबंदी याचिका दाखल करप अशे पर्याय दवरल्यात.
समाजीक कार्यकर्ते आनी कांय बोगदाच्या लोकांनी बुधवारा पत्रकार परिशद घेतली. ह्या वेळार मुरगावचे उपनगराध्यक्ष रामचंद्र कामत, नगरसेवक लिओ रॉड्रिग्ज, नगरसेविका मंजुषा पिळणकार, नगरसेवक दयानंद नायक, अशोक कांबळी, सगुण नायक, रामदास होबळे, पास्कॉल फर्नांडीस, राधाकृष्ण धुरी, अर्जुन सातोस्कार, प्रशांत दाबोळकार, विलासिनी तांबोस्कार, सुहासिनी तांबोस्कार तशेंच हेर बोगदा हांगचे नागरीक हाजीर आशिल्ले.
हे रेस संबंदी थळाव्ळाञक विस्वासांत घेनासतना, तांकां गृहीतूच धून रेसीचो निर्णय घेतलो. हे रेसीक लागून थळाव्यां मदीं भंयाचें वातावरण निर्माण जालां. हे रेसीक लागून बोगदाच्या थळाव्यांक आनीक त्रास जातले. तांकां तीन-चार वरां भायर सरपाक मेळचें ना. तांकां आपलीं वाहनां पयस दवरचीं पडटलीं. हाका लागून आवाजाचें प्रदुशण आनी हेर नागरी समस्यांक तोंड दिवचें पडटलें अशें खडपकार हांणी म्हणलें.
ही रेस घेवपा खातीर विवीध सरकारी यंत्रणां, थळावीं यंत्रणांची परवानगी घेवची पडट, परवाने दिवचे पडटात. मात आजूनय मुरगांव पालिके कडल्यानूय कसलीच परवानगी घेवंक नाशिल्ल्याचो दावो खडपकार हांणी केला. ह्या प्रकरणांत 13तारखेक मुरगांव पालिका मंडळाचे बसकेंत रेस विशीं चर्चा करतले अशें तांणी म्हणलें. सरकरान हे रेसीचेर 50 कोटीं परस चड रुपया खर्च करपा परस मुरगांवच्या विवीध उदरगती कामांचेर ते पयशे खर्च करचे अशें तांणी सांगलें.
आमी जे मुद्दे हाजीर केल्यात, त्या संबंदी संबंधितांनी स्पश्टीकरण दिवप गरजेचें. ही रेस शिकपी चालकां खातीर आशिल्ल्यान तातुंतल्यान एखादी वायट घडणूक घडल्यार हाका कोण जापसालदार आसतलो? असो प्रस्न तांणी हाजीर केलो. तशेंच हे रेसी खातीर सुमार 15 हजार लोक हाजीर रावतले अशें आमदार सांगतात. जाल्यार तांची वेवस्था खंय करतले हे विशीं कांयच स्पश्ट जावंक ना, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
