भांगरभूंय | प्रतिनिधी
मुरगांव : मुरगाव सडा-बोगद्यावेल्या रस्त्या वेल्यान जावपी आंतरराष्ट्रीय ‘फॉर्मुला 4 सर्किट रेस’ येसस्वी करपाक मुरगांवच्या सगल्या नागरिकांनी राज्य सरकाराक सहकार्य करचें. सर्ती वेळार सडा- बोगद्यार कसलीच समस्या निर्माण जावची ना. जर ती निर्माण जाल्यार, हांव सगल्यांत पयलीं जनते वांगडा उबो रावन सर्तीक खर विरोध करतलों, अशी गवाय मुरगांवचे आमदार संकल्प आमोणकार हांणी दिली. हे सर्ती विशीं मुख्यमंत्री डॉ. प्रमोद सावंत शेनवारा बायणाच्या रवींद्र भवनांत जनतेक फॉर्मुला 4 रेस विशीं सविस्तर म्हायती दितले. सगल्या मुरगांवकारांनी, समाजसेवकांनी हे बसकेक हाजीर रावपाची मागणी आमदार आमोणकार हांणी केली.
ही आंतरराष्ट्रीय पांवड्यावेली ‘फॉर्मुला 4 सर्किट रेस’ 1आनी 2 नोव्हेंबराक जातली. हे सर्ती आड कांय समाजीक कार्यकर्ते, कांय नगरसेवकांनी खर विरोध केला. तशेंच ही सर्त गोंयांत हेर खंयचेय सुवातेर घेवची, अशी मागणी केल्या. सर्तीचें काम सद्या सडा – बोगदो, मुरगांव पतन प्राधिकरणाचे (एमपीए) सुवातेर सुरू आसा. ही सर्त येसस्वी करपाक आमदार आमोणकार हांणी फुडाकार घेतला. हे सर्तीक लागून लोकांक बरोच फायदो जातलो. ती सांजेवेळार तीन वरांची जातली. पर्यटनाचे आनी अर्थीक नदरेन गोंयांक हे सर्तीचो व्हड फायदो जातलो, अशी म्हायती आमदार आमोणकार हांणी दिली. ही सर्त गोंयांत पयलेच फावट जाता आनी तीय मुरगांवां जाल्ल्यान जनतेन असले आंतरराष्ट्रीय सर्तीक कारणा बगर विरोध करचो न्हय. सर्ती सुवातेर बर्यांतल्या बऱ्यो सुविधा आमी दितले. हाचो फायदो फुडाराक गोंयच्या खेळगड्यांक जातलो. सर्त पळोवपाक 15 हजार परस चड प्रेक्षक येतले अशें आमोणकार हांणी सांगलें.
फॉर्मुला 4 सर्कीट रेस मुरगांवां आयोजीत करपाक आयोजकां वांगडा सरकाराचो तीन वर्सांचो करार जाल्ल्याची म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
