भांगरभूंय | प्रतिनिधी
‘अाशादीप’ विद्यालयांतल्या विद्यार्थ्यांचोय केलो भोवमान
मुरगांव: श्रीदामोदर भजनी सप्ता उत्सवांत मुरगांव पोर्ट ट्रस्ट फैलवाले कामगार संघटणे वतीन सांस्कृतीक कार्यावळी बराबरूच एमपीएच्या निवृत्त कामगारांचो भोवमान केलो. तशेंच एमपीए आस्थापनाच्या विशेश ‘आशादीप’ विद्यालयांतल्या विद्यार्थ्यांक भेटवस्तू भेटावन तांचो भोवमान केलो.
मुरगांव पोर्ट ट्रस्ट फैलवाले कामगार संघटणे वतीन श्रीदामोदर भजनी सप्ता निमतान मुरगांव रुमडावाडो हांगासरल्या श्रीरुमडेश्वर देवळाचे मायेचेर मुखेल सोयरे म्हूण मुरगांव पत्तन प्राधिकरणाचे अध्यक्ष डॉ. एन. विनोद कुमार हाजीर आशिल्ले. तांचे सयत विशेश आमंत्रीत म्हूण एमपीएचे मुखेल अभियंतो सुरेश पाटील, मुरगांवचे नगरसेवक दामोदर नायक, फैलवाले कामगार संघटणेचे सल्लागार प्रभाकर साळगांवकार, संघटणेचे अध्यक्ष विठोबा हुमाणे, सचीव भरत पाटील, उपाध्यक्ष सुरेश गुरव, दिलीप नायक, महादेव म्हाळगावकर, निलेश केरकार, बलराम बांदेकार, महादेव बोवकर, देवानंद शिरोडकार, अशोक वेंगुर्लेंकार आनी हेर वांगडी हाजीर आशिल्ले.
फैलवाले कामगार संघटणे वतीन एमपीएचे निवृत्त कामगार आदले अध्यक्ष नवनाथ नायक, विठ्ठल नायक, सुभाष शिरोडकार, सांक्रू फर्नांडीस, विष्णू मोपकार, नागेश नायक, श्रीशल रांगगुडा, भरत साखोळकार, मुडकप्पा तलवार, रत्नाकर केळूस्कार, गोपी कुडाळकार हांचो भोवमान मुखेल सोयरे एमपीए अध्यक्ष डॉ. एन. विनोद कुमार हांचे हस्तुकीं केलो. तशेंच विशेश आशादीप विद्यालयांतल्या विद्यार्थ्यांक हाजीर आशिल्ल्या मानेस्तांचे हस्तुकीं भेटवस्तू भेटोवन भोमान केलो.
कार्यावळी सुरवात मानेस्तांचे हस्तुकीं दिवली पेटोवन जाली.
पुराय कार्यावळीचें सुत्रसंचालन राजाराम गडेकार जाल्यार उपकार नवनाथ नायक हांणी मानलें. उपरांत गुरुवर्य बाबू गडेकार हांणी वर्सुकी पद्दतीन भजन सादर केलें.
ह्या वेळार फैलवाले कामगार संघटणे वतीन गायिका दिपाली देसाय (मुंबय) आनी सुशांत गांवस (गोंय) हांची भजनाची कार्यावळ सादर केली. रुमडेश्वर देवस्थान दिंडी पंगडाच्या गजरांत ‘पार’ वास्को श्रीदामोदर देवस्थानांत गेलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
