भांगरभूंय | प्रतिनिधी
नगराध्यक्षः मडगांव पालिका मंडळाची घेतलों विशेश बसका
भांगरभूंय । प्रतिनिधी
मडगांवः मडगांव पालिकेच्या पुरुमेंताच्या फेस्तांतल्यान आयिल्ले कराचे 17.66 लाख रुपया तिजोरेंत जमा नात. मुख्याधिकाऱ्यान आपल्याक विस्वासांत घेनासतना फेस्त केल्लें. मुख्याधिकाऱ्याचो पीए आनी कनिश्ठ लिपीक योगेश्वर शेटकार हाणें आपल्या खात्याचेर पयशे दवरले आनी अजून लेगीत पयशे भरूंक नात. पालिका मंडळाची विशेश बसका घेतलों. ह्या प्रकाराची खोलायेन चवकशी करचे खातीर मुख्यमंत्र्यांक लेगीत पत्र बरयतलों, पूण पयशे सोडचों ना, अशें नगराध्यक्ष दामोदर शिरोडकार हांणी सांगलें.
मडगांव पालिकेंतल्या पुरुमेंताच्या फेस्ताच्या पयशांचो गैरवेव्हार जाला. कनिश्ठ लिपीर योगेश्वर शेटकार हाणें कराचे 17.66 लाख रुपया आपल्या बँक खात्यांत जमा केले. हाचे वयल्यान मुख्याधिकारी गौरीश शंखवाळकार हांणी लिपीक योगेश्वर शेटकार हाका निलंबीत केला.
हे विशीं नगराध्यक्ष दामोदर शिरोडकार हांणी म्हायती दितना सांगलें, फाटलीं दोन वर्सां पुरुमेंताचें फेस्त सगळ्यांक वांगडा घेवन मनयिल्लें. पूण अंदूं न्यायालयाचो आदेश आशिल्ल्याचें कारण दिवन मुख्याधिकाऱ्यान आपल्याक कुशीक दवरून अधिकाऱ्यांची बसका घेतली आनी नियोजन केलें. तांणीच समिती स्थापन करून पयशे एकठांय करपाची जापसालदारकी दिल्ली. पयल्या दिसाचे 10 लाख 40 हजार रुपया पालिकेचे तिजोरेंत जमा आसात. ते उपरांतचे 17.66 लाख कराची रकम लिपिकान आपल्या बँक खात्याचेर जमा केली. तशेंच जायंटव्हिलाची 5 लाखांची रकम आपणे सांगिल्ल्यान पालिकेच्या जनाल्याचेर जमा केल्या. ताका लागून 15.40 लाखांचो महसूल जमा आसा. पूण दुसऱ्या दिसा पसूनची रकम जमा ना. हाची म्हायती मेळटाच आयताराच अधिकाऱ्यां कडेन चर्चा केली आनी सोमारा सगळ्यांक बेगीन आपयले. त्या वेळार केल्ले चवकशेंत शेटकार हाणें पयशे गुगल पे वयल्यान आपल्या खात्यांत जमा केल्ल्याची आनी तिजोरेंत जमा करूंक नाशिल्ल्याची म्हायती मुख्याधिकाऱ्याक दिल्ली, अशें स्पश्ट सांगलें. तशेंच पालिका अभियंते ते समितींत आसून लेगीत पावतीची रकम तांणी शेटकार हाचे कडेन कित्याक दिली, होवूय एक प्रस्न उरताच. तांकां कोणे सुचोवण्यो केल्ल्यो, हाची चवकशी जावन मडगांव पालिकेचो महसूल तिजोरेंत जमा जावपाची गरज आसा, अशें नगराध्यक्ष शिरोडकार हांणी सांगलें.
निलंबनाचे आदेश आपले परवानगे बगरूचः नगराध्यक्ष
पालिकेंतल्या एकाद्या अधिकाऱ्याक वा कर्मचाऱ्याक निलंबीत करपाचें आसत जाल्यार मुख्याधिकाऱ्या कडल्यान पालिकेचो मुखेली म्हूण नगराध्यक्षाक सांगपाचें वा ताची परवानगी घेवपाची गरज आसता. पूण मुख्याधिकाऱ्यान वरिश्ठांच्या आदेशा वयल्यान कनिश्ठ लिपिकाक निलंबीत करता अशें टिपण बरोवन निलंबीत केला त्या प्रकरणाची नोंद लेगीत करूंक ना, अशें नगराध्यक्ष दामोदर शिरोडकार हांणी सांगलें.
‘मुख्यमंत्री, नगर नियोजन मंत्र्याक बरयतलों पत्र’
मडगांव पालिकेच्या महसुलांतलो गैरवेव्हार खपोवन घेवचों ना. ह्या प्रकरणा विशीं मडगांवचे आमदार दिगंबर कामत हांचे कडेन चर्चा करतलों. तशेंच मुख्यमंत्री, नगर नियोजन मंत्री हांचे सयत जीएमए कडेन लेगीत पत्र वेव्हार करतलों. कायदेशीर सल्लो घेतले उपरांत मडगांव पालिका मंडळाची विशेश बसका घेतले. खंयचेच परिस्थितींत पालिकेच्या महसुलाचें लुकसाण जावपाक दिवचों ना, अशें नगराध्यक्ष दामोदर शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
