भांगरभूंय | प्रतिनिधी
एक RIP पोस्ट, एक कमेंट, आनी हजारांच्या काळजांत भंय. मागीर थोड्या वेळा उपरांत कळटा तें सगलें फट आशिल्लें….
सादारण तीन वर्सां पयलींची गजाल. गोंयचो एक लोकप्रीय समाजसेवक अचकीत भायर पडपाची बातमी समाज माध्यमांतल्यान व्हायरल जाल्ली. तेन्ना म्हाकाय ती फॉरवर्ड करुं अशें दिसलें, म्हणून एका इस्टाक वॉट्सअॅप केली. ताणें हांवें केलें तशेंच केलें. दुसरे दिसा सकाळीं ताचो फोन आयलो. हरशीं गुडमॉर्नींग म्हणून दिसाची शुभेत्सा दिवपी म्हजो इस्ट ‘तूं जें किदेंय वॉट्सअॅप फॉरवर्ड करता ताची पयलीं त्या पोस्टा विशीं निश्चीत खात्री करून घे आनी फुडें धाड. तुवें ज्या मनशाली मरणाची बातमी म्हाका फॉरवर्ड केली, आनी हांंवें ताच्या चल्याक आर्गां ओंपपी संदेश धाडलो, जाल्यार ताणें तशें कांयच घडलें ना म्हणपाचें सांगले’ अशें सामक्या तिडकीच्या उतरांनी सांगून फोन बंद केलो. तें आयकून म्हाकाय सामको पच्छाताप जालो.
हाचे आदीं भारताचे आदले प्रधानमंत्री अटल बिहारी वाजपेजी, गान कोगूळ लता मंगेशकार, क्रिकेटर कपील देव आनी कितल्याश्याच जाणांक समाज माध्यमांनी जिते आसतनाच मरण आयिल्ल्याच्यो खबरो पातळायिल्ल्यो. जेश्ठ अभिनेतो धर्मेंद्र हॉस्पिटलांत उपचार घेवपाक गेल्लो. कांय खिणा भितर कोणें तरी धर्मेंद्र भायर पडपाची इंटरनेटार बातमी पातळायली. पूण धर्मेंद्र रुटीन उपचार घेवन घरा आयलो. घरकान्न हेमा मालिनीन सोशियल मिडियार धर्मेंद्राल्या भलायकेचो खुलासो केलो आनी फट बातमी पातळावप्यांचो निशेध केलो. धर्मेंद्रजी गेले नात, पूण समाजांतली भावनां निश्चीतपणान गेली. फेसबुकाचेर पयलो आर्गां ओंपपी पोस्ट घालपा खातीर कांय जाणांच्या मनांत चलपी संघर्श कितलो प्रामाणीक आसा तें म्हाका खबर ना. पूण सोशल मिडिया वांगडाच म्हाकाय ही खबर दिवपी न्यूज चॅनल कितली विस्वासपात्र आसा तें कळ्ळें, आनी खरें म्हणल्यार वयलीं सगलीं पोस्ट करपी लोक ह्या खबरां चॅनलाच्या चुकीचे बातमेचे भकीक पडले अशें दिसलें.
सकाळीं सोशल मिडियाचेर अभिनेतो धर्मेंद्र संवसारांतल्यान भायर पडपाची बातमी घुंवपाक लागली त्या गजालीचेर विस्वास बसलो ना. कारण तांच्या घरांतल्यान कसलेंच अधिकृत ट्वीट येवंक नाशिल्लें. पूण मागीर एका खिणाक सगली कडेन RIP पोस्ट, फोटो, आर्गां अशे कांय कितलेशेच फेसबूक वापरप्यांनी सर्गार म्हान आत्म्याक शांती मेळची असो फटीच्या पोस्टाचेर व्यक्त जातना आर्गां ओंपलीं. जाल्यार कांय जाणांनी आमच्या भुरगेपणांतलो नायक संवसार सोडून गेला अशें बरयलें. आनी कांय वरां उपरांत हेमा मालीनी हांणी पत्रकार परिशद घेवन धर्मेंद्र भलायकेन बरे आसपाचें सांगलें. पूण त्या थोड्या वरांत आमी कितें व्हगडायलें? आमची जाणविकाय, सत्य पडताळपाची आमची जापसालदारकी, आनी थोडें मनीसपण.
धर्मेंद्र जरी अभिनेतो आसून लेगीत एका युगाचें प्रतीक, मोग, सादेंपण आनी शालीनतेचें मुखामळ. शोलेंतलो वीरू आसूं वा बंधनांतलो बापूय, ताणें आमकां सिनेमांतल्यान भावना दिली. आयज सत्य सत्यापीत करिनासतना आमी जिवे आसतनाच ताका मेल्लो जाहीर करप हें कितलें योग्य? प्रामाणीकपणान सांगपाचें जाल्यार ही चूक फक्त सोशल मिडियाचीच न्हय, तर आमचीच संवेदनहीनताय. आयज कोणा कडल्यान खबर मेळ्ळ्यार आमी कसलेंच सत्य सोदपाचो यत्न करिनात, फक्त ‘पयलीं सोशियल मिडियार पोस्ट घालपाचो’ विचार करतात.
एक RIP पोस्ट, एक कमेंट, आनी हजारांच्या काळजांत भंय. मागीर थोड्या वेळा उपरांत कळटा तें सगलें फट आशिल्लें, पूण त्या एका खिणाक कोणाचीय आवय, भुरगें, बापायचें काळीज धडधडिल्लें आसता. पोस्ट करप ही जापसालदारकी, प्रसिध्दी स्टंट न्हय हें आमी विसरल्यात. सहानुभुती दाखोवप म्हणल्यार भावना समजून घेवप, नाटक करप न्हय. तुमी खऱ्या अर्थान मोग करतात आसत जाल्यार फेसबुकार ताचे विशीं लेख बरोवन, ताच्या कार्याची तोखणाय करात, ताका दीर्घायुश्याची कामना करात. जिव्या मनशाक मेल्लो जाहीर केल्ल्यान लज जाता आनी पातक घडटा.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
