भांगरभूंय | प्रतिनिधी
फेसबूक, इंस्टाग्राम हे सोशल मिडिया अॅप आयज सकाळीं बंद जाले. ह्या अॅपांत प्रवेश करतना आनी अॅपांचीं हेर फिचर्स वापरतना वापरप्यांक अडचणी आयल्यो. काळा प्रमाण हे सोशल मिडिया अॅप परतून कार्यक्षम जाल्यात. पूण हो आऊटलेट संवसारी आशिल्लो आनी ताचो परिणाम दोनूय अॅपांचेर जालो आनी वापरप्यांनी एक्साच्या सोशल मिडिया प्लॅटफॉर्माचेर वचून आपलो राग उक्तायलो.
आयज सकाळीं सावन फेसबूक आनी इंस्टाग्राम हे दोनूय अॅप बंद आशिल्ले. ह्या अॅपांतले खंयचेच फिचर्स वापरूंक मेळनाशिल्ले. देखून जायत्या जाणांनी मायक्रोब्लॉगिंग प्लॅटफॉर्म ‘एक्सा’चेर आपलो राग उक्तायलो. एक्साचेर कांय काळ #FacebookDown आनी #InstagramDown हें ट्रँडींग आशिल्लें.
दुसरे वटेन इंस्टाग्राम वापरप्यांक खात्यांत लॉग इन करपाचो यत्न करतना समस्यांक तोंड दिवचें पडटालें. ६६ टक्के वापरप्यांक अॅपा संबंदीत प्रस्न आशिल्ले आनी २६ टक्के वापरप्यांक इंस्टाग्रामाच्या वेब वर्जनांत प्रवेश मेळूंक नाशिल्लो आनी इंस्टाग्रामान अजून ह्या विशयाचेर अधिकृत निवेदन दिवंक ना. देखून हे दोनूय अॅप डाउन जावपाचें कारण उक्तें जावंक ना.
मजगतीं, हे दोनूय अॅप पयलेच खेपे डावन जावंक नात. हाचे आदीं जायते फावटीं हे दोनूय अॅप डावन जाल्यात. पूण तंत्रीक अडचणी सोडोवन परतून ते सारकेय जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
