भांगरभूंय | प्रतिनिधी
रायबंदर फेरी हो पणजेच्यान चोडण, दिवचल आनी सरभोंवतणच्या गांवांनी यो- वच करपाचो लागींचो मार्ग. थंय प्रवाशांची सकाळीं आनी सांजवेळा घे म्हूण गर्दी आसता. पांच फेरीबोटी पसून एकेकदां पावनात. खरें म्हणल्यार रायबंदर ते चोडण पूल 25 वर्सां पयलीं जावपाक जाय आसलो, इतली हांगा मोटारी, दुचाकींची येरादारी आसता. तीन फेरीबोटी आसतात, तेन्ना तर धांदल जाता. पेन्ह द फ्रान्काच्यान चोडणाक जोडपी पूल उबारपाची तयारी जाल्या, पूण जमीन मेळपाची चिन्नां दिसनात. घडये ताकाच लागून रायबंदर – चोडण फेरीसेवा आनीक सुसज्ज करपाचो विचार उदका येरादारी खात्यान चलयला आसतलो. तशी ताची गरजूय आसा. कारण एकाच वेळार दोन फेरीबोटी रायबंदरा लावपाक मेळनात. येरादारीच्या मळाचेर ह्या मार्गाक खूब म्हत्व आसा. हांगा जर फेरीसेवा नाशिल्ली जाल्यार कितें जावपाचें ताचो फक्त विचार गाडयेकार आनी प्रवाशांनी करचो.
सध्या पर्वरे स पदरी उड्डाण पूल बांदपाचें काम चलता. तें 2- 3 वर्सां तरी चलतलें. म्हणटकच येरादारीचेर ताण पडटलो. दिवचल शार आनी मुळगांव, शिरगांव, सर्वण ह्या गांवांनी रावपी, बसीन प्रवास करपी म्हापशें, पणजी मार्ग वापरतात. पणजे पावपाक चडूच उशीर जावपाक लागलो जाल्यार ते चोडण- रायबंदराचो मार्ग आपणावंक शकतात. तेन्ना रायबंदर- चोडण फेरीसेवेक आनीक म्हत्व येतलें. हळदोणें, बिठ्ठोणा ह्या मार्गांचोय विचार जावंक जाय. रायबंदर फेरी प्रवास वेगान जावचो म्हूण सध्या आसा तो धको तीनपट व्हडलो करतले. सध्या णव मिटर आसा, तो 26 मिटर रुंद जातलो. हे काम स्मार्ट सिटी खाला 2 कोटी 70 लाख रुपया खर्च करून करपाचे आसात. धको रुंद जातकच प्रवाशांक, गाडयेकारांक यो- वच करप सोंपें जातलें. टाॅयलेट, तिकेट बूथ उबारपाचेंय थारलां. प्रवाशांक तिकेट लायतले काय सध्या आसा तीच वेवस्था दवरतले, तेंय रोखडेंच कळटलें. हांगा रो- रो फेरीसेवा सुरू करपाचो विचार आसा. डिसेंबर अखेर मेरेन म्हणल्यार फुडल्या दोन म्हयन्यां भितर गाडयेकारांक, प्रवाशांक तिचो लाव जावं येता. रेल्वे वरवीं म्हाल व्हरपी ट्रकांची रो- रो सेवा चलता. ताका लागून ट्रकांक म्हाल पावोवप सोंपें जाता. डिझेल वाटावता, वेळूय उणो लागता. तशीच ही सेवा आसची. पूण, सध्या आसात त्या पोरण्यो फेरीबोटींच्या जाग्यार अत्याधुनीक तंत्रज्ञानाचेर चलपी ह्यो रो- रो बोटी आसतल्यो, अशें दिसता. ह्या बोटींनी चड गाडयो, प्रवासी मावतले. न्हंय हुपपाकूय उणो वेळ लागतलो. रो- रो फेरीबोटीं वांगडा सोलर पावराचेर चलपी खास फेरीबोटूय खंय दवरल्या ती हाडून चलोवची. सौर उर्जे वयले हे बोटीचे कांय दीस धोल वाजताले. पर्यटकां मदींय खोशयेचे ल्हार आयिल्लें खंय. मात बोटीक कितलें दीस मांडवीच्या ल्हारांचो स्पर्श जालो, तें कळूंक ना.
ही रो- रो फेरी लोकप्रीय जाल्यार हांगाच्यान जावपी येरादारी वाडटली. मात ती मोटारीं पुरतीच मर्यादीत दवरची पडटली. कारण हातुर्ले, मयां वा एकूणच त्या वाठारांतले रस्ते चडूच अशीर. ते रुंद करपाक मेळतूच हाची खात्री ना. गांवकारांचो विरोधूय जावं येता. वाटेर आकांताच्यो चडट्योय आसात. म्हणटकच म्हाल व्हरपी व्हडल्या ट्रकांची हांगाच्यान येरादारी जावप तशी कठिणूच. नाजाल्यार रो- रो सेवे वरवीं ह्या मार्गान उद्देगीक वसणुकां खातीर येवपी थोडे तरी ट्रक ह्या मार्गान व्हरूं येताले. पणजेच्यान रायबंदर फेरी, चोडण, मयें, दिवचल, अस्नोडें, दोडामार्ग अशी थेट बससेवा मात सुरू करूं येता. सध्या चोडणाच्यान दिवचले वचपी कांय बसी आसात. तशें जाल्यार दिवचल- म्हापशें- पणजी मार्गान पणजे येवपी प्रवाशांचो मोलादीक वेळ वाटावतलो. रायबंदर – चोडणूच न्हय, तर हेर मार्गां वयल्या फेरीबोट धक्यांची दुरुस्ती जावंक जाय. राज्यांतल्या कांय फेरीमार्गांक लागून रस्त्यां वयलो येरादारीचो ताण उणो जातलो. विशेश म्हणल्यार अपघात उणें जातले. बरेच जाण चोडण- रायबंदर फेरीमार्ग वापरतात. बेगीन पावता आनी वाटेर गाडयोय कमी मेळटात, अशें दरेकलो सांगता. राज्यांत एका काळार न्हंय येरादारी मार्गान जिणेगरजेच्या म्हालाचें हाडप- व्हरप जातालें. काळ बदल्लो तशे ते मार्ग फक्त मिनाचे येरादारी पुरते उरले. निदान तांचो वापर दीसपट्टो प्रवास, म्हाल येरादारी, पर्यटना खातीर जावचो. अपघात, प्रदुशण देंवतलें. लोकांची भलायकीय बरी उरतली. राज्यांतले सगलेच फेरीमार्ग
बळिश्ट जावचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
