भांगरभूंय | प्रतिनिधी
रायबंदर-चोडण फेरी मार्गावेली घडणूक
पणजी: चोडणा- रायबंदर मार्गार सेवा दिवपी ’मडगांव’ फेरयेच्या हायड्रॉलीक यंत्रणेंत काल मंगळारा सांजेवेळार ६.३० च्या सुमाराक अचकीत इबाड जाल्ल्यान व्हड बोवाळ जालो. ह्या तांत्रीक इबाडाक लागून फेरयेचो रॅम्प उदकांत कोसळ्ळो. रॅम्पार उबे आशिल्ल्या खुबश्या प्रवाशांचो तोल गेल्ल्यान ते सकयल पडले, हाका लागून खुबश्या जाणांक किरकोळ दुखापत जाली.
सध्या चोडण-रायबंदर मार्गार ४ पोरण्यो फेरी आनी २ रोपॅक्स फेरी कार्यरत आसात. ह्या मार्गा वेली गर्दीय पोरूं परस चार पटीनी वाडल्या. जायते फावटी फेरी चालक गडबडीन चुकीचे तरेन फेरी धक्याक लायता. हाका लागून प्रवाशांक वाहनां चडयतना आनी देंवयतना धोको निर्माण जाता.
हायड्रॉलीक इबाडाक लागून रॅम्पार उब्या आशिल्ल्या प्रवाशांकूय दुखाापत जाली. जाल्यार पडिल्ल्यान कांय जाण फेरयेंत आशिल्ल्या गाडयांक आदळ्ळे. हातूंत एका कर्मचार्याचो मोबायल फोन उदकां पडलो. एके बायलेक तिचे गाडये सयत उदकांत पडटना वाटयली.
ह्या अपघाता उपरांत तिडकल्ले प्रवाशी सरळ फेरयेच्या कॅप्टनाच्या कॅबिनांत पावले. कॅप्टनाची बेजबाबदार ड्रायव्हींग आनी निश्काळजीपणाक लागून हो अपघात जाल्ल्याचो आरोप करीत प्रवाशांनी ताका प्रस्न विचारले. कॅप्टनान हायड्रॉलिक यंत्रणेंत इबाड जाल्ल्यान हें जालें अशी जाप दिली. वयल्यान कांय स्पश्ट दिसना अशीय जाप दिली. कॅप्टनाची ही वागूक पळोवन प्रवसी आनीक तिडकले. तांणी प्रशासनाचे भुमिकेचेर खर तिडक उक्तायली.
ह्या मार्गार पोरण्यो फेरी आनी तांच्या कामगारांचीं बेजापसालदारपणां धोको निर्माण करता. ह्याच कारणाक लागून खुबशे फावटीं बारीक सारीक अपघात घडप, फाटले गाडयेचो फुडले गाडयेक धपको बसप हें सदचेंच जालां. ह्या मार्गार सुरक्षीत फेरी आनी अदी अणभवी तशेंच जापसालदार कर्मचारी बेगोबेग निवडचे, ना जाल्यार फुडाराक व्हड घडणूक घडपाची शक्यताय आशिल्ल्याचो भंय तिडकल्ल्या प्रवाशांनी उक्तायलो. प्रशासनान हे घडणुकेची बेगोबेग दखल घेवन दोशींचेर कारवाय करपाची मागणी प्रवाशांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
