भांगरभूंय | प्रतिनिधी
राज्यपाल फाल्यां गोंयांत : कोणाक काडटलें तें स्पश्ट ना
भांगरभूंय । प्रतिनिधी
पणजी : राज्यपाल पी. एस. श्रीधरन पिल्लई आनी मुख्यमंत्री डॉ. प्रमोद सावंत हांचे मदीं जाल्ले चर्चेक लागून मंत्रीमंडळ फेरबदलाचे प्रक्रियेक गती आयिल्ल्याचें स्पश्ट जालां. ताका लागून कांय मंत्र्यां मदीं दुगदूग वाडल्या. मंत्रीमंडळांतल्यान कोणा कोणाक काडटले. हें अजून स्पश्ट जावंक ना. ताका लागून मंत्रीपद तिगोवपा खातीर दरेक मंत्री आपापले तरेन यत्न करतात.
राज्यपाल पिल्लई सोमारा दनपारां गोंयांत येतले. ते उपरांत मुख्यमंत्री डॉ. प्रमोद सावंत आनी भाजप प्रदेशाध्यक्ष दामू नायक रोखडेच दिल्ली वतले. ताका लागून फुडल्या सप्तकांत खंयच्याय खिणाक मंत्रीमंडळांत फेरबदल जावपाची शक्यताय आसा.
दोन वर्सांनी फेरबदलाच्यो हालचाली अदीक वाडिल्ल्यान आनी मुख्यमंत्री डॉ. सावंत हांणी ते विशींचे स्पश्ट संकेत दिल्ल्यान मंत्रीपदा खातीर इत्सुकां मदीं खोशयेचें वातावरण पातळ्ळां. पूण निश्क्रीय मंत्री आनी तांच्या कार्यकर्त्यां मदीं मात किण्ण शांतताय पातळ्ळ्या. मंत्रीमंडळ फेरबदलाचे फाटभुंयेर, खूबशे मंत्री विवीध कारणां खातीर मुख्यमंत्र्यांची परतून परतून भेट घेतात. हाचे वयल्यान तांचे मदलीं अस्वस्थताय दिसून येता, अशें सरकारी सुत्रांनी ‘भांगरभूंय’ कडेन उलयतना सांगलें.
उण्यांत उणें चार जाणांक नाल्ल !
भाजपांतल्या वरिश्ठ सुत्रांनी दिल्ले म्हायती प्रमाण सध्याचे स्थितींत तीन मंत्र्यांक काडून तांचे सुवातेर नव्या तीन आमदारांक संद दिवपाचो निर्णय मुख्यमंत्री डॉ. प्रमोद सावंत हांणी घेतला. पूण मगो कडली युती तोडपाचो निर्णय जालो जाल्यार सुदिन ढवळीकार हांकांय मंत्रीमंडळांतल्यान काडटले. ताका लागून तिगां वांगडाच आनीक एका आमदाराक लेगीत मंत्रीपदाची सोर्त लागपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
