भांगरभूंय | प्रतिनिधी
गोवा बोर्डाचो निर्णय; हे आदीं पेपर परतून तपासपाक घेताले 700 रुपया
भांगरभूंय । प्रतिनिधी
पणजीः धावी आनी बारावेचे परिक्षेक बसपी विद्यार्थ्यांक निकाला उपरांत पेपराची परतून तपासणी करपाची आसल्यार आतां दरेका प्रस्ना खातीर 100 रुपया मेजचे पडटले. हे आदीं पुराय पेपर परतून तपासपा खातीर 700 रुपया घेताले. पूण आतां फेरतपासणी खातीर 100 रुपयांचें शुल्क घेतले, अशी म्हायती गोवा बोर्डाचे अध्यक्ष भगीरथ शेट्ये हांणी शेनवारा पत्रकारां कडेन उलयतना दिली.
अंदूं बारावेची परिक्षा 10 ते 28 फेब्रुवारी ह्या काळांत जातली. जाल्यार धावेची परिक्षा1 ते 20 मार्च ह्या काळांत जातली. परिक्षेचो निकाल लागले उपरांत खूबशे विद्यार्थी आपल्याक मेळिल्ल्या गुणांचेर समाधानी आसनात. तांचे कडल्यान पेपराचे फेरतपासणेची मागणी करतात. हे आदीं अशे तरेची मागणी आयली जाल्यार संबंदीत विद्यार्थ्या कडल्यान पुराय पेपरा खातीर 700 रुपयांचें शुल्क घेताले. पूण हे खेपे मात दरेका प्रस्ना खातीर 100 रुपयांचें शुल्क घेवपाचो निर्णय गोवा बोर्डान गेतला, अशें शेट्ये हांणी सांगलें.
मजगतीं, धावी आनी बारावेची परिक्षा दिवपी खूबशे विद्यार्थी स्वताक मेळिल्ल्या गुणांचेर दुबाव उक्तावन पेपराचे फेरतपासणेची मागणी बोर्डा कडेन करतात. ते आदीं संबंदीत विद्यार्थ्यांक पुराय पेपराचे तपासणे खातीरचें शुल्क बोर्डाक दिवचे पडटाले. पूण हे खेपे मात दुबाव आशिल्ल्या प्रस्नांच्या गुणांचीच तपासणी करून वेळ वाटावपाचे नदरेन बोर्डान नेमांत बदल केला, अशी म्हायती गोवा बोर्डांतल्या सुत्रांनी ‘भांगरभूंय’ कडेन उलयतना दिली.
पयलीं मागची पडटली फोटोकॉपी
पेपर फेरतपासणेची मागणी करतना विद्यार्थ्यांक पयलीं फोटोकॉपीची मागणी करची पडटली. ते प्रमाण चार ते पांच दिसांनी फोटोकॉपी दितले. ते उपरांत विद्यार्थ्यांक ज्या प्रस्नाच्या गुणा विशीं दुबाव आसा, ताची म्हायती दिवची पडटली. ते खातीर विद्यार्थी आपल्या शिक्षकांची लेगीत मजत घेवपाक शकता. ते प्रमाण दरेका प्रस्ना खातीर 100 रुपयांचें शुल्क घेवन विद्यार्थ्यांनी सादर केल्ल्या प्रस्नांचीच फेरतपासणी करतले, अशे भगीरथ शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
