भांगरभूंय | प्रतिनिधी
भांगरभूंय । प्रतिनिधी
पणजीः बंगालच्या उपसागरांत तयारज जाल्ल्या आनी तमिळनाडू आनी आंध्रप्रदेशाच्या दर्यांत पावल्ल्या मेंडोस चक्रीवादळाक लागून गोंयां सयत शेजारच्या राज्यांत पावस पडपाक लागला. गोंयांत आयतारा कांय कडेन मध्यम जाल्यार कांय कडेन नेटाच्यो दडको पडल्यो. ह्या पावसा वांगडा राज्यांत फेब्रुवारी म्हयनो सोडून वर्सभरयां पावसाची नोद जाल्या.
गोंयच्या हवामान खात्याचे विज्ञानीक राहुल मोहन हांणी ही म्हायती दिली. फेब्रुवारी म्हयन्यांत उत्तर गोंयांत पावसाची नोंद जाली ना. दक्षीण गोंयांत जानेवारी आनी फेब्रुवारी म्हयन्यांत पावसाची नोंद जाली ना.. अंदू पावसाळ्यांत 107.08 इंच पावसाची नोंद जाली. मान्सूना ययलीं 6.18 इंच जाल्यार मान्सूना उपरांत 4.44 इंच पावसाची नोद जाल्या. अदूं सुमार 117 इंच पावसाची नोंद आतां मेरेन जाल्या अशें राहुल हांणी सांगलेें.
मान्सूना उपरांत ऑक्टोबर म्हयन्यांत 6 ऑक्टोबर सोडून 24 ऑक्टोबर मेरेन सेगीत पावसाची नोंद जाली. 21 ऑक्टोबराक सगल्यांत चड 0.6 इंच पावसाची नोंद जाली जाल्यार नोव्हेंबर म्हयन्यांत वट्ट सात दीस पावस पडलो. पोरूं वर्स भर पावस पडिल्लो. मेंडोस चक्रीवादळाचो प्रभाव उणो जाला. फकत चक्राकार ल्हारा बाकी आसात. अरबी दर्यांत कमी दाबाचें क्षेत्र तयार जावपाची शक्यताय आसा. ताका लागून 13, 14 आनी 15 डिसेंबराक गोंयांत कांय कडेन पावस पडपाची शक्यताय आसा अशें राहुल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
