भांगरभूंय | प्रतिनिधी
नवी दिल्ली, खबरां संस्था ः भारतांतली सगळ्यांत व्हडली विमान कंपनी इंडिगो सेगीत तिसऱ्या म्हयन्यांत देशांतली सगळ्यांत वेळार येवपी विमान कंपनी थारली. एव्हिएशन रेग्युलेटर डायरेक्टर जनरल ऑफ सिव्हिल एव्हिएशनाच्या (DGCA) फेब्रुवारी 2025च्या आंकडेवारी प्रमाण, इंडिगोचीं 80.2% विमानां दिल्ली, मुंबय, बेंगळुरू आनी हैदराबाद ह्या मेट्रो विमानतळांचेर वेळार आशिल्लीं.
इंडिगोचो बाजारांतलो वांटो 63.7% आशिल्लो. फेब्रुवारींत 1.40 कोटी देशी प्रवाशांनी विमानान प्रवास केल्लो. हांतुत फाटल्या वर्सा परस 11 टक्क्यांनी वाड आसा. पूण जानेवारीं म्हयन्याच्या तुळेंत (1.46 कोटी) 4 लाख उणे प्रवासी आसात.
फेब्रुवारींत इंडिगोन 89.4 लाख प्रवाशांची येरादारी केली
फेब्रुवारींत इंडिगो एअरलायन्सान सगळ्यांत चड प्रवाशांची येरादारी केली. इंडिगोतल्यान 89.4 लाख प्रवाशांनी प्रवास केलो. हाचे उपरांत 38.3 लाख प्रवाशांनी एअर इंडियातल्यांन आनी अकासा एअरांतल्यान 6.58 लाख प्रवाशांनी प्रवास केलो.
कागाळींत मात्शी वाड..
फेब्रुवारींत प्रवाशांच्या कागाळींत मात्शी वाड जाली. सगल्या विमान कंपनींनी प्रवाशांचे संबंदीत वट्ट 821 कागाळी आयल्यो. फाटल्या वर्सा फेब्रुवारी परस हें 30 पटींनी चड आसा. फेब्रुवारी 2024 वर्सा 791 कागाळी आयल्ल्यो. दर 10,000 प्रवाशां फाटल्यान सुमार 0.58 कागाळी नोंद जाल्यो, तांतुतल्या 99% कागाळी सुटाव्यो जाल्यांत.
तंत्रीक कारणांक लागून 42.4% उड्डाणां रद्द
नागरी विमान येरादारी महासंचालनालयाच्या आंकडेवारी प्रमाण, फाटल्या म्हयन्यांत उड्डाणांक कळाव जाल्ल्यान 82,506 प्रवाशांचेर परिणाम जाला आनी विमान कंपन्यांनी प्रवासी सेवां खातीर सुमार 1.24 कोटी रुपया खर्च केलां. फेब्रुवारींत विमानां रद्द जाल्ल्यान 18,717 प्रवाशांचेर परिणाम जाल्ल्यान विमान कंपनींक लुकसाण भरपाय म्हणून सुमार 24.86 लाख रुपया फारीक करचे पडले.
विमानां रद्द जावपाचें सगळ्यांत व्हडलें कारण तंत्रीक इबाड. हाका लागून 42.4% विमानां रद्द जालीं. जाल्यार 29.8% विमान सेवा ऑपरेशनल कारणांक लागून आनी 21.6% विमानां वायट हवामानाक लागून रद्द जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
