भांगरभूंय | प्रतिनिधी
नवी दिल्ली, खबरां संस्था ः फेब्रुवारींत शिवराक थाळी 1 टक्क्यांनी देंवून 27.2 रुपया जाली. फाटल्या वर्सां फेब्रुवारी 2024 त शिवराक थाळीचे दर 27.5 रुपया आशिल्ले. ही म्हायती क्रिसिलान (CRISIL) जाहीर केल्ल्या म्हयन्याळ्या फूड प्लेट दर निर्देशकांत दिल्या.
फाटल्या म्हयन्यांतल्या जानेवारीच्या तुळेंत फेब्रुवारीत शिवराक थाळीच्या दरांत 5 टक्क्यांनी उणाव जाल्ल्याचें क्रिसिलान तांच्या ‘आरआरआर: रायस रोटी रेट’ अहवालांत सांगलां. जानेवारीत शिवराक थाळीचे दर 28.7 रुपया आशिल्ले.
मांसाहारी थाळी 6% म्हारग…
फेब्रुवारीत मांसाहारी थाळी 6 टक्क्यांनी वाडून 57.4 रुपया जाली. फाटल्या वर्सा फेब्रुवारीत 2024 वर्सां मांसाहारी थाळीचो दर 54 रुपया आशिल्लो. म्हयन्याच्या आदाराचेर म्हळ्यार जानेवारीच्या तुळेंत फेब्रुवारीत मांसाहारी थाळीचे दर 5% देंवले. जानेवारीत मांसाहारी थाळीचो दर 60.6 रुपया आशिल्लो.
टोमॅटो आनी एलपीजीचे दर उणे जाल्ल्यान…
क्रिसिलाच्या अहवाला प्रमाण, टोमॅटो आनी एलपीजीचे दर उणे जाल्ल्यान शिवराक थाळीचे दर देंवले. टोमॅटोचे दर वर्सुकी 28% उणे जाल्यात. एलपीजी सिलिंडर 11 टक्क्यांनी सवाय जालां. वर्सुकी तत्त्वाचेर कांद्याचे दर 11%, बटाटाचे दर 16%, वनस्पती तेलाचे दर 18% वाडल्या. एका शिवराक थाळीच्या दरांत बटाट आनी टोमॅटोचो वांटो 24% आसता.
चिकनाचे दर वाडिल्ल्यान….
मांसाहारी थाळीच्या दरांत ही वाड ब्रॉयलर म्हणल्यार चिकनाच्या दरांत वर्सुकी 20% वाड जाल्ल्यान जाल्या. मांसाहारी थाळीच्या खर्चांत ब्रॉयलर चिकनाचो वांटो 50% आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
