भांगरभूंय | प्रतिनिधी
भांगरभूंय । प्रतिनिधी
वाळपयः फ्रेंड्स सर्कल आनी नेहरू युवा केंद्राच्या वांगड्यांनी सत्तरी तालुक्यांतल्या पाली हांगच्या घसघसो सुवातेची नितळसाण केली. पावसाच्या दिसांनी लोक घसघश्यांच्या सुवातांनी येवंन थंय कोयर उडयतात. ताका लागून कोयर एकठांय जावन ताचो पर्यावरणाचेर वायट परिणाम जाता. ते खातीर ही नितळसाण मोहीम हातांत घेतिल्ली. नगरगांव सरकारी माध्यमीक विद्यालयाचो मुख्याध्यापक देविदास कोटकार आनी हेरांनी तातूंत वांटो घेतिल्लो.
सत्तरी तालुक्यांतल्या हेर घसघसो सुवातेची नितळसाण करपाचें फ्रेंड्स सर्कलान थारायलां. पाली धसघश्याचे सुवातेर एकठांय केल्लो कोयर तांणी वाळपय पालिकेचे सुवादीन केलो. पर्यटकांनी घसघश्याचो सुवातो नितळ दवरून सैमाची राखण करची अशें तांणी मागलां. फ्रेंड्स सर्कलाचो अध्यक्ष धुळू शेळके, सचीव प्रशांत मोटे, उपाध्यक्ष लक्ष्मण झोरे, लक्ष्मण खरवत, जानू पिंगळे, भैरू वरक, नेहरू युवक केंद्राचे आदित्य बोट्टकार, सातू गांवकार, अर्जुन खरपालकार हांणी घसघसो वाठार नितळ केलो.
सैमाची राखण करपाचे काम दरेकल्यान करपाक जाय. सैम नितळ दवोरल्यार मनशाची भलायकी बरी उरपाक शकता असें देविदास कोटकार हांणी सांगलें. फ्रेंड्स सर्कला वतीन पर्यावरण राखणे खातीर झाडां लावपाचें काम हातांत घेतलां अशी म्हायती सर्कलाचो अध्यक्ष धूळ शेळकेन सांगलें. पर्येची आमदार दिव्या राणे हिणे घसघश्यांच्या वाठारांनी पर्यटकां खातीर सुविधा तयार करपाची जी घोशणा केल्या तिका तांणी येवकार दिला. अश्यो सुविधा तयार केल्यार वाठार नितळ दवोरप शक्य जातलें अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
