भांगरभूंय | प्रतिनिधी
चित्रपटांत जायतीं पात्रां साकारुन लेगीत तिका फावो ती लोकप्रियता मेळ्ळी ना. मात टिव्हीन तिका फिल्मां परस चड लोकप्रियता दिली.
ज्येश्ठ अभिनेत्री तबस्सुम गोविल हिणें 1947 वर्सा बाल कलाकार म्हूण सिने मळार कारकीर्द सुरू केली. दिसपाक गोड, चुणचुणीत आशिल्ल्यान प्रेक्षकांक ती खूब आवडूंक लागली. तेन्ना प्रेक्षकांनीच दिल्ल्या बेबी तबस्सुम नांवान फुडें लोकप्रीय जाली.
19 जुलय 1944 दिसा उत्तर प्रदेशांतल्या अयोध्या शारांत स्वातंत्र्य झुजाऱ्यांच्या घराब्यांत जल्मल्ले तबस्सुमाल्या बापयलें नांव अयोध्यानाथ सचदेव जाल्यार आवयचें असगरी बेगम. तबस्सुम हिणें मुंबयत मुळावें शिक्षण घेता आसतना 1947 त तीन वर्सांचे पिरायेर अभिनेत्री नर्गिस हिचे वांगडा ‘दीदार’ सिनेमांत नरगिसाच्या भुरगेपणांतली भुमिका केली. हो तिचो बाल कलाकार म्हणून पयलो सिनेमा. उपरांत 1947 वर्सा ‘मेरा सुहाग’ आनी ‘बडी बहन’ हेय चित्रपट प्रदर्शीत जाले. ‘बैजू बावरा’ (1952) ह्या सिनेमात तिणें मीना कुमारीचें भुरगेपणांतलें पात्र रंगयलें. 1952 तल्या ‘दीदार’ फिल्मांतलें ‘बचपन के दिन भुला ना देना…’ हें लता मंगेशकर आनी शमशाद बेगम हांणी गायिल्लें गीत बेबी तबास्सुमचेर चित्रीत जालें. तें खूब लोकप्रीय जाल्लें. फुडें जुवानपणांत तबसुम्माक जायत्या चित्रपटांनी अभिनेत्री म्हणून काम करपाची संद मेळ्ळी. दिलीप कुमार, राज कपूर, नरगिस, मीना कुमारी, अशोक कुमार, राज कुमार, देवानंद, शशि कपूर ह्या जायत्या कलाकारां वांगडा चरित्र अभिनेत्री म्हणून काम करतल्या अभिनेत्रीं मदली तबस्सुम एक.
तिणें फिल्मांनी नांव जोडलें खरें, पूण चित्रपटांत जायतीं पात्रां साकारुन लेगीत तिका फावो ती लोकप्रियता मेळ्ळी ना. मात टिव्हीन तिका फिल्मां परस चड लोकप्रियता दिली. दूरदर्शनान तिका ल्हान पडद्याचेर हाडून पयलो भारतीय दूरचित्रवाणी टॉक शो ‘फूल खिले हैं गुलशन गुलशन’ सुरू केलो आनी ताचे वरवी तबस्सुम हें नांव घराघरांनी पावलें. हे कार्यावळींत ती सिनेमा कलाकारां कडेन मेकळेपणान उलयताली. हे कार्यावळीक प्रेक्षकांनी उपाट प्रतिसाद दिलो. सिनेमामोगी हे कार्यावळीक मुद्दाम रावताले. ‘खिले हैं गुलशन गुलशन गुलशन’ शो दूरदर्शनाचेर तीन- चार वर्सां न्हय तर 21 वर्सां प्रक्षेपीत जालो. उपरांत तिणें 15 वर्सां हिंदी नेमाळ्यांत संपादक म्हणूनय काम केलें.
तबस्सुम वैयक्तीक जिवीतांत ‘रामायण’ हे माळेंत रामाची भुमिका केल्ल्या अरुण गोविलाचो व्हडलो भाव विजय गोविल हाची घरकान्न. तबस्सुम आनी विजय हांकां होशांग नांवाचो एक पूत आसा. ती भुरगेपणांत इंडस्ट्रींत आशिल्ली. खूब गोड दिसपी बाल कलाकाराक व्हड जातकच प्रेक्षक सहसा स्विकारीनात. आपल्या मनांतल्यान ते बालकलाकाराक काडून उडोवंक शकनात. तबास्सुमाचें बाबतीन अशेंच घडलें. व्हड जातकच तिका चित्रपटांनी मुखेल भुमिका करपाची संद मेळ्ळी. पूण येस मेळ्ळें ना. पूण दूरचित्रवाणीन तेंच येस मेळोवन दिलें. प्रेक्षकांक टिव्ही वयली तिची उलोवपाची शैली खूब आवडटाली. कलाकारांक प्रस्न विचारपाची पद्दत आवडटाली. कलाकारय आपलीं सगळीं गुपीतां उक्तायताले. दर एका व्हडल्या कलाकाराली ‘फुल खिले हैं गुलशन गुलशन’ कार्यावळींत वांटो घेवपाची इत्सा आसताली. हांगा कलाकारांक हेर खंयच सांगूंक मेळनाशिल्ली गजाल सांगपाक मेळटाली. म्हणून लोक हो शो मुजरत पळयताले. अमिताभ बच्चनाची मुलाखत घेवपाची तबास्सुमाक व्हड इत्सा आशिल्ली. ते खातीर तिणें खूब यत्न केल्लो, पूण शक्य जालें ना. पूण एके कार्यावळीत तबस्सुम व्हीलचेराचेर बसून सूत्रसंचालन करपाक आयिल्ली तेन्ना कार्यावळी सुवातेर उजो लागपाची भिरांकुळ घडणूक घडली आनी प्रेक्षक जिवाचेर आयिल्ले आकांतातल्यान सुटपाक वाट मेळत तशे धांवपाक लागिल्यान खेटाखेट जाली. तबस्सुम खूब भियेल्ली, कारण व्हीलचेरार आशिल्ल्यान ते दिसा तिचो जीव वचूंक शकतालो, आदारा खातीर ती विनवणी करताली, पूण थंय सोयरो अभिनेतो अमिताभ बच्चन हाजीर आशिल्ले. तिका पळोवन फिल्मांतल्या नायकाचे प्रवेशाचे शैलींत तांणी तिका उज्या पसून आनी खेटाखेटी पसून वांचयली. हे घडणुके उपरांत कांय म्हयन्यांनी अमिताभ बच्चना कडेन ‘फुल खिले हैं गुलशन गुलशन’ कार्यावळींत तिची भेट जाली.
तबस्सुमाक आदीं सेगीत दोन फावटीं काळजाचो आताक आयिल्लो. मागीर पोटाच्या विकारांक लागून अॅडमिट आसतना काळजाचो परत आताक आयलो आनी तिका मरण आयलें. तो दीस आशिल्लो, 18 नोव्हेंबर 2022.
——————————–
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
