भांगरभूंय | प्रतिनिधी
मडगांव: मडगांवां फूड अॅण्ड कल्चरल फेस्टिव्हल ह्या वर्सा प्रमाण दर वर्सा मडगांव शारांत सुरू उरतलो. ह्या महोत्सवांतल्यान थळावे अन्नपदार्थ आनी गोंयच्या संस्कृतायेचें दर्शन घडोवपाचें काम करतात. हातूंत थळाव्यांनी घेतिल्लो वांटोय तोखणायेचो आसा अशें मुख्यमंत्री डॉ. प्रमोद सावंत हांणी म्हणलें.
गोंय सरकाराच्या पर्यटन खात्याच्या माध्यमांतल्यान मडगांवां फूड अॅण्ड कल्चरल महोत्सव 2025 चें आयोजन केलां. ह्या महोत्सवाचें उक्तावण मुख्यमंत्री डॉ. प्रमोद सावंत हांचे हस्तुकीं जालें. ह्या वेळार पर्यटन मंत्री रोहन खंवटे, मडगांवचे आमदार दिगंबर कामत, नगराध्यक्ष दामोदर नायक, आदले आमदार दामू नायक हांचे सयत नगरसेवकांची हाजेरी आशिल्ली. ह्या वेळार सुरेश फडते, जॉन डिसिल्वा, रोस फर्न आनी अविनाश मार्टिन्स हांचो गोंयचे खाद्यपदार्थ आनी संस्कृताय सांबाळपाच्या कार्या खातीर भोवमान केलो.
मुख्यमंत्री डॉ. सावंत हांणी सांगलें, मडगांवां आयोजीत केल्लो फूड अॅण्ड कल्चरल फेस्टिव्हलांतले स्टॉल्स हे थळावे अन्नपदार्थ विक्रेत्यांचे आनी आपसेवी गटांचे आसात. हातूंतल्यान थळाव्या विक्रेत्यांक फायदो जातलो. हांगा आयोजीत केल्ल्या सांस्कृतीक कार्यावळींनीय थळाव्यांकूच प्राधान्य दिलां. भोवमान करपा खातीर वेंचिल्ल्या व्यक्तींचेंय कार्य पळोवन तांचो भोवमान केला. फुडले दोन दीस ह्या महोत्सवांत सगल्यांनी वांटो घेवचो. हे खातीर कसलीच प्रवेश फी आसची ना अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
