फूट टाळपाचे काँग्रेसीचे नेटाचे यत्न

भांगरभूंय | प्रतिनिधी

राजकी खवदळ सुरूच, 5 काँग्रेस आमदार भाजपाचे वाटेर

पणजी : आमदारांची फूट टाळपाचे काँग्रेसीचे यत्न सुरूच आसले तरी उण्यांत उणें पांच आमदार भाजपाचे वाटेर आशिल्ल्याची म्हायती गोपांनी दिली. आयतारा बसका आनी भेटी गाठींक लागून राजकी खवदळ सुरूच आशिल्लो. दिगंबर कामत, मायकल लोबो, डिलायला लोबो, राजेश फळदेसाय आनी केदार नायक हे भाजपांत प्रवेश करपाचे वाटेर आशिल्ल्याची चर्चा आसा. पूण अधिकृत गोपां कडल्यान हे म्हायतीक तेंको ना.

दिगंबर कामत आनी मायकल लोबो हांचे काँग्रेसीचे आमदार फोडपाचे कारस्थान आसा. हाका लागून काँग्रेस दोगांचेरूय कारवाय करतली अशें काँग्रेसीचे प्रभारी दिनेश गुंडू राव हांणी सांगलें. काँग्रेसीचे कांय आमदार फुटून भाजपांत प्रवेस करतले अशी चर्चा शेनवार सावन सुरू जाली. शेनवारा काँग्रेसीची बसका पणजेंत जाली. आयतारा मडगांवच्या हॉटेलांत आमदारांची बसका जाली. हे बसकेंत दिगंबर कामत हाजीर नाशिल्ले. मायकल लोबो, राजेश फळदेसाय, संकल्प आमोणकार, आलेक्स सिक्वेरा हे हाजीर आशिल्ले. ही बसका दनपारां सुरू जाली. ही बसका सोंपले उपरांत प्रदेश अध्यक्ष अमीत पाटकार आनी हेर आमदार दिगंबर कामत हांच्या घरा गेले. दिगंबर कामत हांची मनधरणी करपाचे यत्न जाले. उपरांत आमदार, प्रभारी दिनेश गुंडू राव, प्रदेश अध्यक्ष अमीत पाटकार हे सगले जाण पणजे येवपाक भायर सरले. आमी सगले काँग्रेस पक्षांत आसात. कोणूच आमदार फुटचो ना, अशें मायकल लोबो हांणी मडगांवां बसके उपरांत माध्यमां कडेन उलयतना सांगलें.

सभापतीची विधानभवनांत उपस्थिती

सभापती रमेश तवडकार हे दनपाराच विधानभवनांत दाखल जाले. हाका लागून राजकी घडणुकांची सुलूस लागली. रातीं मेरेन ते विधानभवनांत आसले. रातीं उसरा ते पणजेंतल्या एका हॉटेलांत दाखल जाले.

भाजपा कडल्यान आमदारांचेर चेपण: चोडणकार

काँग्रेसीचे आदले प्रदेशाध्यक्ष गिरीश चोडणकार हांणी आमदारांचे बसके उपरांत आमदार फुटपाचे चर्चेंत तथ्य आसा, पूण सद्या कोणूच वच्चो ना अशें सांगलें. काँग्रेसीच्या आमदारांनी देवा कडेन सोपूत घेतला. प्रतिज्ञापत्र दिला अशें आसून लेगीत ते वचत आसल्यार ते पक्षाक फटयतले, मतदारांकूय फटयतले पूण देवाक फटोवंक शकचे नात. तशेंच लोकूय ओगी रावचे नात. भाजपा कडल्यान आमदारांचेर चेपण हाडपाचें काम जाता. पयशे, ऑफर बी दितात. पूण काँग्रेस आमदार चेपणा खाला येवचे नात असो दावोय चोडणकार हांणी केलो.

चार आमदार मुख्यमंत्र्यांच्या बंगल्यार

काँग्रेसीन सांजे 6.30 वरांचेर सगल्या आमदारां सयत पत्रकार परिशदेचें आयोजन केल्लें. सुरवेक पयली दोनूच आमदार हाजीर आशिल्ले. उपरांत तीन आमदार आयले. मायकल लोबो, राजेश फळदेसाय, केदार नायक, डिलायला लोबो हे सांजे सात वरांचेर मुख्यमंत्र्यांच्या आल्तिनो बंगल्यार पावले. हाका लागून हे चार जाण फुटपाचे निश्चीत आसा, हे चर्चेक नेट आयलो.

हांव रिटायर्ड हर्ट : दिगंबर कामतदिगंबर कामत हे आयतारा मडगांवचे बसकेक गैरहाजीर आशिल्ले. बसकेचें म्हाका कांयच खबर ना. कसली बसका? हांव रिटायर्ड हर्ट आसा, अशी प्रतिक्रिया तांणी दिली. मडगांव सावन पणजे वचपाक ते भायर सरिल्ले. तरी सांजे ते काँग्रेस हावजात हाजीर नाशिल्ले. मुख्यमंत्र्याच्या आल्तीन बंगल्याचेरूय ते हाजीर नाशिल्ले.