भांगरभूंय | प्रतिनिधी
शिगमो हो १४ दिसांचो वसंत ऋतूचो उत्सव फाल्गुनांत गोंयांत मनयतात. रंगांचो उत्सव म्हणल्यार शिगमोत्सव. गोंयच्या वेगवेगळ्या वाठारांनी हो उत्सव विवीध पद्दतीन मनयतात. विंगड विंगड भेस धारण करून, विवीध तरेचे नाच करून, धोल-ताश्यांच्या गजरा गोंयच्या दरेका म्हालांत विवीध तरांनी गोंयकार हो शिगमोत्सव उमेदीन मनयतात. असोच ह्याच काळांत जावपी एक उत्सव म्हणल्यार दिवचल म्हालांतल्या आमोण्यां गांवचो ‘गोसांय’ हो फुलांचो उत्सव. हो उत्सव फुलांचो. गळ्यांत तरातराच्या फुलांचे हार घालून हे गोसाय सजतात. येवपी आयतारा म्हणल्यार २३ तारखेर आमोणा गांवांत मनोवपी ह्या उत्सवा विशीं आयज आमी जाणून घेवया.
आमोण्या गांवांत गोसांय उत्सव मनयतात. पुडवें न्हेंसून, गळ्यांत तरातरांच्या फुलांचे हार घालून, गांवभर भोंवून घरांघरांनी देवाचो कौल दितात, ताका ‘गोसांय’ म्हणटात. ताका फुलांचो उत्सव अशेंय म्हणटात. ह्या गोसांया भितर दोन प्रकार आसतात. आदले आनी नवे गोसांय.
सकाळीं हे गोसांय आमोण्यां तारीर संवळें न्हेंसून, गळ्यांत फुलांचे हार घालून एकठांय येतात. उपरांत सावतांची कमिटी सगळ्या गोसांयांच्या कपलाक सुक्या शेणयांचो पिठो लायता. हांगचे तारीर आशिल्ल्या श्री भुतनाथाच्या देवळा कडेन घाडी गाराणें घालता. हें गाराणें घातले उपरांत ह्या उत्सवाक सुरवात जाता.
गाराणें घालतना ‘कुचे’ म्हणल्यार मोड घेवन आशिल्ल्या गोसांयांचेर देवाचो भार येता.
ह्याच भारार गोसांय सरळ थंय लागींच आशिल्ल्या महादेवाच्या देवळा कडेन वतात. उपरांत थंय देवळा भायल्यानूच मान दिवन अमरावती, आमोणेंच्या श्री शांतादुर्गा रवळनाथाच्या देवळा कडेन येतात. देवळा भायल्यानूच देवीक मान म्हळ्यार कौल दिवन देवळा मुखार आशिल्ल्या देसायांच्या घरांत गोसांय भितर सरतात. ह्या घरान कौल दिवन मागीर शेणवी आमोणकरांच्या घरांत वतात. हांगा कौल दिवन चार कुळांक कौल दिवपाची प्रथा आसा. फडट्यांचें देवूळ, गांवसाचें देवूळ, परबांचें देवूळ आनी सिनाऱ्यांचें देवूळ, ह्या चारूय कुळांक कौल दिले उपरांत शिरपान चडटा. शिरपान चडप म्हळ्यार शिमेर वचून गाराणें घालप.
शिरपानाचें गाराणें घाले उपरांत आमोणेच्या दरेका घरान कौल दिवपाक गोसांय भायर सरतात. दरेका घरांनी ते मोड घेवन वतात. घराघरांनी ह्या मोडांची पुजा जाता. उपरांत पुराय आमोणें गांवच्या घरांनी दीस आनी रात भोंवून हांगच्या लोकांक आशिर्वाद आनी कौल दितात.
भोंवता भोंवतां आनी कौलां दितां दितां म्हणसर दुसरो दीस उजवाडटा. दुसर्या दिसा दनपरां हे गोसांय परत तारीर पावतात. हांगा भुतनाथाच्या देवळा कडेन भंडारो जाता. मागीर जे कोण नवे गोसांय जातात तांचे घरचे तारीर आशिल्ल्या सगळ्यांक पुरी आनी चण्या रोस खावपाक दितात. अंदूं नवे गोसांय तयार जाल्यात, हें सांगपाची ही तांच्या घरच्यांची ही एक पद्धत. ही प्रथा जाले उपरांत परत एक फावट कुचे घेवन गोसांय महादेवाच्या देवळा कडेन वतात. थंय मागीर सायबिणीक, वेताळाच्या तरंगांक आनी दोनूय कुच्यांक गुलाल घालता. गुलाल मारून आमोण्यां गांवचे धुळवटीक सुरवात जाली काय हांगचे पुराय गांवचे तशेंच गांवां भायले लोक उमेदीन ही धुळवट मनयतात.
तर हो फुलांचो उत्सव येवपी आयतारा म्हळ्यार २३ मार्चाक व्हडा आमोण्यां मनयतले. तशेंच दुसरे दीस म्हळ्यार सोमारा २४ तारखेक हांगा धुळवट जातली. हांगच्या गोसायाक तशेंच धुळवटीक गांवचे तशेंच गांवां भायलेय लोक उमेदीन वाटेकार जातात. अंदूं हो फुलांचो उत्सव आयतारा आयला. हाका लागून भाविकांची गर्दी जावपाची शक्यताय आसा. दर वर्सा प्रमाण अंदूंय हांगचो गोसाय उत्सव आनी धुळवट भक्तीभावान मनयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
