भांगरभूंय | प्रतिनिधी
राज्यपाल : राजभवनांत तेलंगणा राज्य स्थापना दीस मनयलो
पणजी: आयज गोंय राजभवना वतीन तेलंगणा राज्याचो स्थापना दीस मनयतात आनी ह्यान फुडें हेर राज्यांचो लेगीत स्थापना दीस मनयतले. जाका लागून आपल्या राष्ट्राची संस्कृताय जाणून घेवपाक मदत जातली, अशें राज्यपाल पी एस श्रीधरन पिल्लय हांणी म्हणलें.
गोंय राजभवना वतीन तेलंगणा राज्य स्थापना दीस मनयलो. ह्या वेळार राज्यपाल उलयताले. दोनापावला राजभवनार आयोजीत कार्यावळींत गोवा तेलगू असोसिएशनाचे वांगडी वांटेकार जाल्ले.
गोंयचे राज्यपाल पी एस श्रीधरन पिल्लय हांणी तेलंगणा राज्यांतल्या लोकांक स्थापना दिसाचीं परबीं भेटयलीं. भारत हो विविधतायेन नटिल्लो देश आसा. आमच्या देशांत विविधतायेंत एकवट आसा, अशें राज्यपालान ह्या वेळार उलयतना म्हणलें.
राज्यपालान तेलंगणा राज्याचे निर्मिती खातीर योगदान दिल्ल्या फुडार्यांक आर्गां ओंपून तेलंगणा राज्यांतले जनतेक पर्जळीत फुडार आनी समृद्धी खातीर परबीं भेटयलीं.
एनआयओचे मुखेल शास्त्रज्ञ डॉ. मुरलीधर कोचेर्ला हांणी तेलंगण राज्यांचो भुगोलीक, राजकीय, इतिहास आनी संस्कृतीची म्हायती दिली.
राज्यपालांचे सचीव एम. आर. एम. राव हांणी आपल्या भाशणात तेलंगणा राज्याच्या निर्मिती फाटलो इतिहास सांगलो.
अॅड. श्रीमती रीता पिल्लय, गोवा तेलगू असोसिएशनचे सचीव वामसी कृष्णा नाझिनेनी आनी हेर वांगडी कार्यावळीक हाजीर आशिल्ले.
हे कार्यावळी उपरांत सांस्कृतीक कार्यावळ जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
