भांगरभूंय | प्रतिनिधी
फुटपाथांची रुंदाय वाडयिल्ल्यान आतां येरादारी ठप्प जावपाचे प्रकार आख्खे पणजेंत जातात.
सोळा दीस उरल्यात पणजी म्हापालिका वेंचणुकेक. बुधवार 11 मार्चाक मतदान. 13 वेर निकाल. धपको दिवपी निकाल लागता काय मतदार सध्या आसा तांचेरूच विस्वास दवरतात, ताचे कडेन फक्त पणजेकारूच न्हय, तर पुराय राज्याचें लक्ष आसतलें. गोंयांत अशीं कांय कुटुंबां आसात. तांकां हारोवप खूब कठीण. (पूण अशक्य न्हय!) हे खेपे भाजपाचें मोंसेरात पॅनल उबें आसा, तर ताच्या विरोधांत उत्पल मनोहर पर्रीकार हांचें ‘आमी पणजेकार’ पॅनल. तांकां भाजपा विरोधी पक्ष तेंको दितात काय नात, तें कळटलेंच. काँग्रेसीन तेंक्याचें ‘आस्वासन’ दिलां. कोणूय जिखून येवं गोंयचे राजधानीत अजून करपा सारकें खूब कितें आसा.
भाजपा समर्थक मोंसेरात पॅनलान सध्याची कामगिरी, उदरगतीचेर भर दितले अशें म्हणलां. सध्या तें सत्तेर आशिल्ल्यान आनी पणजे- ताळगांवचें राजकी सम्राट म्हणूं येता, अशा मोंसेरात कुटुंबाचो वरदहस्त आशिल्ल्यान तांकां जैताची चड संद आसा. मात, वेंचणूक, खेळाचे बाबतींत कोणूच कांय सांगपाक शकनात. देखून हे खेपे धक्को दिवपी निकाल लागतले, अशें बऱ्याच राजकी जाणकारांक दिसता. तो लागल्यार राज्य पांवड्या वयल्या राजकारणाक वेगळें मोडण मेळटलें, असो दावोय ते करतात. तर विरोधकांनी कसिनो प्रस्नाचेर भर दिला. सगलें कितें पणजेकारांचेर आसा, मूळ आनी थंय स्थायीक जाल्ल्या. 30 मतदारसंघांचे हे म्हापालिकेंत बरींच वर्सां ह्या पॅनलाचो शेक आसा. तो मतदार कायम दवरतले, आमी फाटले खेपे 25 जिखिल्ले, अंदूं तातूंत वाड जातली, अशे ते म्हणटात.32,496 मतदार आसात. दादले मतदारां परस 2050 बायलो चड आसात. म्हणटकच पणजेक बरे दीस दाखोवपाची जापसालदारकी नारीशक्तीच्या भुजांचेरूच आसा.
घोशणा सगलेच करतात, पूण पणजेक जापसालदारकी घेवपी जाय. हुंवारमुक्त, नितळ, दुर्गंधमुक्त पणजी हीच खरी स्मार्ट सिटी. आस्वासनां सगल्यांनीच दिल्यांत, पूण तीं चालीक लागूंक जाय. पणजी समस्यामुक्त जावची. नागरीक जागे जाले काय शार वांचता, अशें म्हणटात. पळोवया. आश्वासनां आकर्शक आसून उपकारना, तीं वास्तववादी, कालबद्ध आसपाक जाय. तांचे ‘जुमले’ जावंक उपकारना. कसिनो हो सध्याचो गरम विशय आसा. ताका लागून जावपी समस्या सोडोवपाक प्राधान्य दितले, अशें ‘आमी पणजेकार’ म्हणटात. सरकाराची तिजोरी ह्या जुगाराचेर चलता, हाचेंय भान तांकां दवरचें पडटलें. कसिनोक लागून येरादारीची कोंयडी, पार्किंगेचे त्रास जातात. पुलीस पसून ही समस्या सोडोवंक पावूंक नात. घडये तांच्या पायांत अदृश्य बेडयो आसत. आतां तर मांडवींत 7-8 मजली उंचायेची जुगार बोट येता खंय. ते खातीर न्हंय खोलावची पडटली. काम सुरू जालां अशें कानार येता.
पे पार्किंगा कडल्यान मेळपी येणावळ मुळाव्या सुविधांचेर खर्च करूं येता. पूण बरेच गाडयेकार पे पार्किंगाच्या आड आसात. मेळत थंय गाडयो लायिल्ल्यान ई- बशींक आडमेळीं जातात. नवे पार्कींग झोन करचे पडटले. फुटपाथांची रुंदाय वाडयिल्ल्यान आतां येरादारी ठप्प जावपाचे प्रकार आख्खे पणजेंत जातात.
पणजेचो बाजार नितळ करपाचो आसा. मतदारसंघांत शारा भायले वाठार येतात, थंयूय उदरगतीचीं कामां जावचीं. सांतिनेज खारीज नितळ करपाक करोडांनी रुपया मोडूं येतात, पूण हें काम पावसाचेर सोडिल्लें बरें. स्मार्ट सिटी खणपाचें काम परत सुरू जालां. सध्या बरेच कडेन रस्ते, गटारां खणून दुरुस्ती करतात. बेवारशी सुण्यांक खाणांचे जागे जाय. वीज, उदकाची समस्या सदांचीच. आधुनीक बसस्टाॅप येवपाचे आशिल्ले. ते परस कदंब बस स्टॅण्ड दुरुस्त केल्यार प्रवासी उपकार मानतले.
हें सगलें काम करपाची संद कोणाक मेळटा आनी उपरांत तें काम खरेंच करतात काय ना, ताचेर पणजेकारांनी पांच वर्सां लक्ष दवरचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
